مەودا میدیا-

لەناو شاری سلێمانی، هێزەكانی ئاسایش 20 بازرگان و بەكارهێنەری مادەی هۆشبەر دەستگیردەكەن و جۆری ئەو مادە هۆشبەرانەش ئاشكرادەكرێت كە پێیانبووە.

دەزگای ئاسایشی هەرێم ئەمڕۆ سێشەممە 22ی ئاب-2023 رایگەیاند، بەڕێوەبەرایەتیی مادە هۆشبەرەکانی دەزگای ئاسایش، لەناو شاری سلێمانی 20 تۆمەتباری بازرگان و بەکارهێنەری مادەی هۆشبەری دەستگیرکرد.

بەپێی زانیارییە بەردەستەكان، هێزەکانی دەزگای ئاسایشی هەرێم، لە چوارچێوەی هەوڵە بەردەوامەکانیان بۆ دەستگیرکرنی بازرگان و بەکارهێنەرانی مادە هۆشبەرەکان و رێگریکردن لە بڵاوبونەوەی ئەو مادانە کە کاریگەریی خراپیان لەسەر کۆمەڵگە دەبێت، بەبڕیاری دادوەری لێکۆڵینەوەی ئاسایش، چەند بازرگانێكی مادەی هۆشبەریان دەستگیركردووە.

ئاماژە بەوەشكراوە، لە چەند هەڵمەتێکی جیادا لە سەرەتای مانگی ئاب-ی ئەمساڵ 20 بازرگان و بەکارهێنەری مادەی هۆشبەر دەستگیردەکەن و دەستدەگرن بەسەر ئەو مادە هۆشبەرانەی کە تۆمەتباران مامەڵەیان پێوەکردووە و بەکاریانهێناوە کە پێکهاتبوون لە ( تلیاک، حەشیش، ئەفیون، کریستاڵ، مەریوانە).

ئەوەش هاتووە، تۆمەتباران خەڵکی هەرێمی کوردستان و دەرەوەی هەرێمن، تەمەنیان لە نێوان 23-50 ساڵدایە و سێ لە تۆمەتباران لە رەگەزی مێ-ن.

هاوكات باس لەوەشكراوە، لەکاتی دەستگیرکردنی ئەو تۆمەتبارانە، دەستگیردراوە بەسەر سێ دەمانچە و بڕی 70 ملیۆن دیناری عیراقیدا.

لەئێستادا بەبڕیاری دادوەری لێکۆڵینەوەی ئاسایش، تۆمەتباران بە مادەکانی ( 25، 26،30 ) راگیراون و لێکۆڵینەوە لە دۆسییەکانیان بەردەوامە.

ژ.ع