مەودا میدیا-
وەهاب هەڵەبجەیی، ئەندامی سەركردایەتی یەكێتی نیشتمانی كوردستان و بەڕێوەبەری گشتی دژەتیرۆری كوردستان، پەیامێكی بۆ یادی 28 ساڵەی خیانەتی 31ی ئاب بڵاوكردەوە و دەڵێت"ئەو تاوانە تا ئەبەد تا ئەبەد وەك گەورەترین مۆركی خیانەت لە دەفتەری یادەوەری كورددا دەنوسرێتەوە". 

هەروەها دەڵێت "ئێستا كە 28 ساڵ بەسەر ئەو خیانەتەدا تێپەڕدەبێت، ئەوەی كە ناهێڵێت برینی 31ی ئاب ساڕێژ ببێت ئەوەیە كە بە ڕوویەكی قایمەوە پاساو بۆ ئەو خیانەتە دەهێنرێتەوە. 
ئەمەش دەقی پەیامەكەیە:

لە دۆخێكی سەختدا و لە هەلومەرجێكی هاوشێوەی 1996دا تاڵیادی 31ی ئاب بەبیردەهێنینە كە تا ئەبەد وەك گەورەترین مۆركی خیانەت لە دەفتەری یادەوەری كورددا دەنوسرێتەوە و نەوە لە دوای نەوە ئەوە دەگێڕنەوە كە هێزێكی كوردی كاتێك توانای نامێنێت ركابەرییەكی شەریفانە بەرامبەر هێزێكی دیكەی كوردی بكات، دەچێت دەستی دوژمن دەگرێت و دەبێتە چاوساغ و كەواسوری بەر تانكەكانی و دەیانهێنێتە سەر ئەو شارەی كە چەندین رۆڵەی هەڵۆئاسای بۆ شۆڕشە جیاوازەكانی گەلی كورد پێگەیاند و لەپێناو ئازادیی هەولێر و كوردستان گیانیان بەختكرد.

ئێستا كە 28 ساڵ بەسەر ئەو خیانەتەدا تێپەڕدەبێت، ئەوەی كە ناهێڵێت برینی 31ی ئاب ساڕێژ بێت ئەوەیە كە بە روویەكی قایمەوە پاساو بۆ خیانەت بهێنرێتەوە، ئەم پێشهاتە ئەوەمان پێدەڵێت، دووبارەبوونەوەی 31ی ئابێكی دیكە هەمووكات ئەگەرێكی كراوەیە و بەرەی خیانەت قەت سڵ لە ئەنجامدانەوەی ئەو كارە ناكاتەوە. 

سەرەڕای ئەو مەترسیانە، بەڵام یەكێتی نیشتیمانیی كوردستان سڵ لەوە ناكاتەوە و بە دەنگێكی دلێرەوە دەڵێت "بەڵێ باڵانسی حكومڕانی راستدەكەینەوە و هەولێر بۆ خاوەنە راستییەكەی دەگێڕینەوە" كە ئەمە تەنها دێڕێكی سادە نییە و بەڵكو پشتبەستە بە هێزی جەماوەر و سندوقەكانی دەنگدان لە هەڵبژاردنی ئایندەی كوردستاندا دەكەینە سەنگی مەحەك.

دەست بە سنگەوە دەگرین لە ئاست شەهیدانی كوردستادا، بە تایبەت ئەو شەهیدانەی لە خیانەتی 31ی ئاب شەهیدبوون و ئەو كەڵە سەركردە و فەرماندە و پێشمەرگە مەزنانەی كە لە 31ی ئابدا كەوتنە دەست بەرەی خیانەت و چارەنووسیان تا ئێستا بە شاراوەیی ماوەتەوە.

وەهاب هەڵەبجەیی
ئەندامی ئەنجومەنی سەركردایەتی ی.ن.ك
ئ پ