مه‌ودا میدیا-

بەسەرپەرشتی بافڵ جەلال تاڵەبانی، سه‌رۆكى یه‌كێتیی نیشتمانیی كوردستان، ئەنجوومەنی سەرکردایەتی یەکێتیی لە شاری هەولێری پایتەختی هەرێمی کوردستان کۆبووەوە و تاوتوێی دواین گۆڕانکارییە سیاسییەکانی لەسەر ئاستی هەرێم و عیراق و ناوچەکە کرد.

راگه‌یه‌ندراوێك له‌ كۆبوونه‌وه‌كه‌ى ئه‌مڕۆ:

لە کۆبوونەوەکەدا جەخت لەسەر گوتاری سەنگین و ڕاشکاویی یەکێتی سەبارەت بە راستکردنەوەی رێڕەوی حکومڕانی و گۆڕینی هاوسەنگی هێز لە کوردستان کرا.

سەرۆکی یەکێتی سەرەتا رووناکی خستەسەر رەوشی سیاسیی کوردستان و عیراق وە سیاسەتی یەکێتی لەبارەیانەوە، بەتایبەتیش ئەنجامی پەیوەندییە دیپلۆماسییە روو لە گەشەکردووەکانمان لە ئاستی عیراق و هەرێم و نێودەوڵەتیدا کە بۆتە مایەی دەسکەوتی گرنگ بۆ گەلەکەمان.

سەرۆکی یەکێتیی روونیکردەوە سەرکەوتنی یەکێتییەکەمان و گەلی کوردستان، بەدەستهێنانی پۆستی پارێزگاری پێکەوەژیان و خزمەتگوزاری ئاوەدانی کەرکوک و بەشداری و شەراکەتمان لە ئیدارەی موسڵ سەرکەوتنێکی گەورەیە کە دەبێ کارێک بکەین ئەم رۆحی سەرکەوتنە سەرتاسەری کوردستان و عیراق بگرێتەوە. هەروەک جەختی کردەوە ئەم سەرکەوتنانە بەرهەمی یەکبڕیاری و یەکڕیزیمانە، پێویستە بە قازانجی گەلەکەمان و چاککردنی ژیان و گوزەرانیان بیخەینەگەڕ.

لەم بارەیەوە  بافڵ تاڵەبانیی موژدەی بە کۆمەڵانی خەڵکی کوردستان دا کە سیاسەتی ڕاستکردنەوەی رێڕەو،  هاوسەنگی هێز و هێنانەکایەی حوکمڕانییەکی دەربەست بکەینە واقیعی بەرجەستە.
کۆبوونەوەی سەرکردایەتی هەروا گفتوگۆی وردی دۆخی ئێستای کوردستانی کرد، بەتایبەتی دواکەوتنی مووچە کە کاریگەری زۆری کردۆتەسەر ژیان و گوزەرانی هاووڵاتیان. کۆبوونەوە پەرۆشی خۆی بۆ چارەسەری ئەم کێشەیە دەربڕی و جەختی لە هاتنەسەرخەتی تیمی دانوستاندنی حکومەتی هەرێم و حکومەتی ئیتحادی کردەوە بۆ پابەندبوون بە بڕیاری دادگای فیدراڵی دەربارەی ئەولەویەتی مووچە و تێکەڵنەکردنی لەگەڵ ململانێی سیاسییدا.

کۆبوونەوەی ئەنجوومەنی سەرکردایەتی کە لە بارەگای  مەکتەبی سیاسیی لە هەولێر بەرێوەچوو، جەختی لە دابینکردنی کەشوهەوایەکی هێمن و مەدەنیانە کردەوە بۆ هەڵبژاردن کە هەموو لایەک بتوانێت بەرنامە و پەیامی  سیاسی خۆی بگەیەنێتە جەماوەر، بەتایبەتی لاوانی دەنگدەری تازە.
لەم بارەیەوە کۆبوونەوەکە پشتیوانی خۆی بۆ گیانی بەرزی یەکێتییانەی هاوڵاتیان لە هەولێر و لە هەموو کوردستان دەربڕی کە وەک هەمیشە ژیرانە و بەجۆش و خرۆشی حزبەکەی سەرۆک مام جەلال ئەم نەبەردییە دیموکراتییە  بەرپا دەکەن بۆ کۆتایی هێنان بە قۆرخکاری دەسەڵات و نوێکردنەوەی حوکمڕانی کە لەبەرژەوەندی کۆمەڵانی خەڵکدا بێت بەبێ جیاوازی. ئاماژەشی بەوەکرد کە یەکێتی چاوی لە ململانێیەکی دیموکراسییە و لەم پێناوەشدا ئامادەی هەڵبژاردنێکی پاک و بێگەردە و هەرگیزیش رێگا بە دەستبردن بۆ پیرۆزییەکانی یەکێتی نادات و بە هێڵی سووری دەزانێ.

کۆبوونەوە بە ویستی سەوزەوە هانی جەماوەری دا کە پێکەوە بەرەو سەرکەوتنی گەورەی یەکێتی لە کوردستان بڕۆین و متمانەی گەلەکەمان بەدەستبێنینەوە.