مەودا میدیا-
نەتەوە یەكگرتووەكان هۆشداری دەدات لەوەی كە هێشتنەوەی پلەی گەرمی جیهان لە ئاستی 1.5 پلەی سەدیدا بە بەراورد بە ئاستی پێش پیشەسازی چیتر ئاسان نابێت و پێشبینی دەكات لە ساڵانی داهاتوودا ئەم سنوورە تێپەڕێنرێت.
لە راگەیەنراوێكدا نەتەوە یەكگرتووەكان ئاماژەی بەوە كردووە” پلەی گەرمی زەوی لە ئێستادا نزیكەی 1.4 پلەی سەدی لە سەرووی ئاستی پێش پیشەسازییەوەیە، ئەوەش دەرەنجامەكانی لە زۆرێك لە ناوچەكاندا دیارە، لەوانەش، وشكەساڵی هەڕەشە لە بەرهەمە كشتوكاڵییەكان دەكات، ئاگركەوتنەوە لە دارستانەكان لە باشووری ئەوروپا زیاتر دەبێت، سەهۆڵبەندانەكان بە خێرایی زۆرتر دەتوێنەوە و زەریاكان ژمارەی پێوانەیی نوێی پلەی گەرمی تۆمار دەكەن”.
دەشڵێت” گەورەترین مەترسی لە سەرهەڵدانی خاڵەكانی وەرچەرخاندایە، لەوانە توانەوەی سەهۆڵبەندانەكانی گرینلاند و ئەنتاركتیكا، تێكچوونی رەوتی زەریای ئەتڵەسی و گۆڕینی دارستانە باراناوییەكانی ئەمازۆن لە ‘سییەكانی هەسارەكەوە’ بۆ نوقمبوونی كاربۆن”.
جەختی لەوەش كردەوە كە “هێشتا دەرفەتەكان هەن، ئەگەر سووتەمەنی بەردین بە خێرایی قۆناغ بە قۆناغ لەناوببرێن، ئەوا بەپێی پسپۆڕان پلەی گەرما دەتوانێت لە نزیكەی 1.8 پلەی سەدیدا بگاتە لوتكە پێش ئەوەی دەست بە دابەزین بكات، بۆ بەدەستهێنانی ئەمەش پێویستە دەردانی گازی ژەهراوی كەم بكەینەوە و ئیكۆسیستەمەكان بگەڕێنینەوە و تەكنەلۆژیا پەرەپێبدەین بۆ هەڵمژینی دووەم ئۆكسیدی كاربۆن لە هەوادا”.
ئەوەشی روونیكردەوە كە “ئەمە تەنها پێویستی بە كەمكردنەوەی دەردانی گازی ژەهراوی نییە بۆ سفر تا ساڵی 2050، بەڵكو پێویستی بە دەرهێنانی یەك گیگاتۆن دووەم ئۆكسیدی كاربۆن لە بەرگەهەواوە دەبێت. شێوازە پێشنیار كراوەكانیش بریتین لە ئامرازە سروشتییەكان، وەك زیادكردنی دارستانەكان، نۆژەنكردنەوەی سروشت و رێگا تەكنەلۆژییەكان”.
ئ پ
