مهودا میدیا-
بەرەبەیانی ئەمڕۆ پێنجشەممە هێرشە مووشەکی و فڕۆکە بێفڕۆکەوانەکانی روسیا، کیڤی پایتهختى ئۆكرانیاى هەژاند و بەهۆیەوە لانیکەم هەشت کەس کوژران و دەیان کەسی تریش برینداربوون، ئەمەش دوای ئەوەی ڤلادیمێر زیلنسکی هۆشداریدا لەوەی مۆسکۆ خۆی بۆ “هێرشێکی بەرفراوان” ئامادە دەکات.
روسیا لە مانگی شوباتی 2022ەوە هێرشی مووشەکی و فڕۆکەی بێفڕۆکەوان بۆ سەر شارەکانی ئۆکرانیا، لەنێویاندا کیڤ، بەردەوام بووە، بووەتە کوشندەترین ململانێ لە ئەوروپا لە دوای جەنگی جیهانی دووەمەوە.
ئەم هێرشە دوای ئەوە هات کە هێزی ئاسمانی ئۆکرانیا هۆشداریدا لە نزیکبوونەوەی مووشەکی بالیستیک لە پایتەخت، هەروەها دوای ئەوەی زیلێنسکی رۆژی چوارشەممە سەردانەکەی بۆ دبلن کورتکردەوە دوای ئەوەی هەواڵە هەواڵگرییەکان باس لەوە دەکەن کە روسیا خۆی بۆ هێرشێکی نزیک بۆ سەر وڵاتەکەی ئامادە دەکات.
زیاتر لە دەیان تەقینەوە لە ناوەڕاست و رۆژهەڵاتی کیڤ بیستراوە و دانیشتووان کە هەندێکیان منداڵ و ئاژەڵی ماڵییان پێبووە، بەپەلە بەرەو وێستگەکانی میترۆ دەڕۆیشتن، کە وەک پەناگە بەکاردەهێنران.
تیمور تکاچێنکۆ، سەرۆکی ئیدارەی سەربازی کیڤ لە تۆڕی کۆمەڵایەتی تێلێگرام رایگەیاند “ژمارەی کوژراوانی هێرشەکەی روسیا بۆ هەشت کەس بەرزبووەتەوە، هاوکات 25 کەسی تریش برینداربوون، لەنێویاندا منداڵ. ئەو ئیدانەی کرد کە بەڕواڵەت بە ئەنقەست ناوچەی نیشتەجێبوون و خەڵکی مەدەنی بە ئامانج گیرا”.
ع
