مەودا میدیا-

وەزارەتی خوێندنی باڵای هەرێم ئەنجامی زانکۆلاینی ئاشکراکرد و بەگوێرەی ئەنجامەکان بۆ ئەمساڵ  43 هەزار و 277 خوێندکار لە زانکۆ و پەیمانگەکانی هەرێمی کوردستان وەرگیراون، کە 62یان لە خوێندنی خۆڕایی و 38%یش لە خوێندنی پارالێڵ و ئێواران وەرگیراون.   

  

لە کۆنگرەیەکی رۆژنامەوانیدا وەزارەتی خوێندنی باڵا دووشەممە 25ی تشرینی یەکەمی 2021 رایگەیاند، "دەرچووانی ئەمساڵ 45 هەزار و 113 کەس داواکاریان پێشکەش کردووە، هەروەها چوار هەزار و 142 خوێندکاری ساڵی رابردوو و هەروەها زیاتر لە سێ هەزار خوێندکاری ساڵانی پێشووتر داوایان پێشکەش کردووە کە سەرجەمیان دەکاتە 52 هەزار و 532 پێشکەشکار".   

  

ئاماژەی بەوەشکرد "لەو ژمارانە، 43 هەزار و 277 خوێندکار لە زانکۆ و پەیمانگەکانی هەرێمی کوردستان وەرگیراون، بەجۆرێک 26 هەزار خوێندکار لە خوێندنی خۆڕایی وەرگیراون، هەروەها 10 هەزار خوێندکار لە ئێواران وەرگیراون و هەشت هەزار و 351 خوێندکاریش لە ئێواران وەرگیراون، کە پارالێڵ و ئێواران خوێندن بەرامبەر بە پارەیە، بەو پێیەش 62%ی خوێندکاران لە خوێندنی خۆڕایی وەرگیراون، 21% لە خوێندنی پارالێڵ و 14%ش لە ئێواران".

  

ئەوەشی خستووتەڕوو، رێژەی وەرگرتن بۆ دەرچووانی ئەمساڵ دەگاتە 82٪ خوێندکار و 18٪ش وەرنەگیراون".   

  

بەوەش رێژەی وەرگرتنی خوێندکار لە خوێندنی خۆڕایی بەراورد بە ساڵی رابردوو کەمی کردووە کە ئەوکات رێژەی 65% لە خوێندنی خۆڕایی وەرگیرابوون.   

  

خوێندکاران و دەرچوانی 12ی ئامادەیی، ئەوانەی فۆڕمی زانکۆلاینیان پڕکردوەتەوە دەتوانن لەڕێگەی ئەم لینکەوە (https://www.regayzanko.com/main.php) ئەنجامەکان وەربگرنەوە.

ر. ر