مەودا میدیا- سەركۆ جەمال

وەزارەتی ناوخۆی حكومەتی هەرێمی كوردستان لە بارەی بڕیاری قەدەغەی هاتووچۆ و رێكارە نوێیەكانی بەرەنگاربوونەوەی كۆرۆنا راگەیەندراوێكی نوێی بڵاوكردەوە، بەپێی ئەو راگەیەندراوەش هاتوچۆی نێوان پارێزگاكان و ئیدارەكان رادەگیرێت، هاتوچۆی نێوان هەرێم و عیراق بۆ ماوەی هەفتەیەك رادەگیرێت.

دەقی راگەیەندراوەكەی وەزارەتی ناوخۆی حكومەتی هەرێم
ئەمڕۆ لیژنەی باڵای بەرەنگاربوونەوەی كۆرۆنا بە مەبەستی گرتنەبەری رێكاری نوێ و تاوتوێكردنی رەوشی خۆپارێزی لە بڵاوبوونەوەی زیاتری پەتای كۆرۆنا كۆبوەوە و ژمارەیەك بڕیاری دەركرد.

پوختەی بڕیارەكان:
یەكەم: لە هەموو شوێنە گشتییەكان هاووڵاتیان دەبێت بە دەمامكەوە بچنە ژوورەوە.
دووەم: سەرجەم سەنتەر و نۆڕینگە پزیشكییەكان بۆ ماوەی 14 رۆژ دادەخرێن.
سێیەم: شوێنە گەشتیارییەكان و پارك و كافتریا و چایخانەكان دادەخرێن.
چوارەم: هۆڵەكانی وەرزش و مەلەوانگە و یانەكانی شەوانە بە داخراوی دەمێننەوە.
پێنجەم: سەرجەم بۆنە ئاینی و كۆمەڵایەتییەكان قەدەغەن.
شەشەم: خواردنگەكان دەبێت تەنیا بە دیلیڤەری كار بكەن.
حەوتەم: هاتوچۆی نێوان پارێزگاكان و ئیدارەكان رادەگیرێت.
هەشتەم: هاتوچۆی نێوان هەرێم و عێراق بۆ ماوەی هەفتەیەك رادەگیرێت.
نۆیەم: هاتوچۆی دیپلۆماتكارانی بیانی و هێزە هاوپەیمانەكان رێگەپێدراوە.
دەیەم:هاتوچۆی ئاژانس و رێكخراوەكانی یوئێن رێگەپێدراوە.
یازدەیەم: شوفێری ئۆتۆمبێل دەبێت دەمامك ببەستێت، بەپێچەوانەوە 50 هەزار دینار سزا دەدرێت.
دوازدەیەم: لە دامەزراوەكانی كەرتی تایبەت دەبێت كارمەندان دەمامك ببەستن.
سیازدەیەم: لە دەرەوەی شوێن و باڵەخانەكان هەر گردبوونەوەیەك دەبێت رەچاوی مەودای مەترێك و نیو بكرێت.
چواردەیەم: ئەوانەی دەگەڕێنەوە دەبێت بەڵێننامە پڕ بكەنەوە كە خۆیان كەرەنتین دەكەن.
پازدەیەم: ئیبراهیم خەلیل بۆ ماوەی یەك هەفتە بە رووی گەشتیاران دادەخرێت.
شازدەیەم: ژووری ئۆپراسیۆنەكان و ئیدارە سەربەخۆكان دەبێت ئەم خاڵانە جێبەجێ بكەن و چاودێری جێبەجێكردنیان بكەن.