مەودا میدیا-

لەسەر داوای ئەندامانی کۆنگرێسی ئەمەریکا سەرۆک وەزیرانی عیراق ماوەی سەردانەکەی بۆ ئەو وڵاتە درێژکردەوە تاوەکو سبەینێ ئێوارەکەی، هەروەها بڕیارە ئەمڕۆ لەگەڵ دۆناڵد ترەمپ، سەرۆکی ئەمەریکا کۆبێتەوە و تاوتوێی چەند پرسێکی گرنگ بکەن لە بوارەکانی ئاسایش و تەندروستی و ئابووری و سیاسی.

بەپێی هەواڵی میدیا عیراقییەکان، مستەفا کازمی، سەرۆک وەزیرانی عیراق لەسەر دوای بەشێک لە ئەندامانی کۆنگرێسی ئەمەریکا ماوەی سەردانەکەی بۆ ئەو وڵاتە درێژکردەوە و بڕیارە ئەمڕۆش لەگەڵ سەرۆکی ئەو وڵاتە کۆبێتەوە.

هەر وەک میدیاکان ئاشکرایان کردووە، درێژکردنەوەی ماوەی سەردانەکەی بەمەبەستی چاوپێکەوتنە لەگەڵ ئەندامانی کۆنگرێس و سەردانیکردنی ناوەند و سەنتەری توێژینەوە و لێکۆڵینەوە گرنگەکانی بواری ئابووری و سیاسی ئەمەریکایە.

جێگای ئاماژەی، دوێنێ چوارشەممە مستەفا کازمی، سەرۆک وەزیرانی عیراق گەیشتە وڵاتی ئەمەریکا بڕیاربوو ئێوارەی ئەمڕۆ ماوەی سەردانەکەی کۆتایی بێت، بەڵام ماوەکەی بۆ ئێوارەی رۆژی هەینی درێژکرایەوە.

س.س