مەودا میدیا-
ئەندامێکی پەرلەمانی عیراق ئاشکرایکرد لە پێناوی پاراستنی ناسنامە و فەرهەنگی نەتەوەیی و بە سوودوەرگرتن لە ماددەی 4)ی دەستووری عیراق، کە رێگا بە بەکارهێنانی زمانی کوردی لە سەرجەم دامودەزگا فەرمی و یاساییەکاندا دەدات، بە فەرمی داوام لە وەزارەتی ناوخۆی عیراق کرد کە پیتە تایبەتەکانی زمانی کوردی (پ، ۆ، ژ، گ، ڤ، ێ، ڕ، ڵ، چ، وو) لە سیستەمی ئەلیکترۆنیی کارگێڕیی حکومەتی فیدراڵدا جێگیر بکات، بە تایبەتی بۆ فەرمانگەکانی ناوچەکانی سنووری ماددەی 140.
پۆڵا شەھید سیروان دێڕەشەیی، ئەندامی پەرلەمانی عیراق راگەیاند “بەهۆی نەبوونی پیتەکانی زمانی کوردی لە سیستمی کۆمپیوتەری فەرمانگەکاندا، ناوە رەسەنە کوردییەکانی وەک (کاڵێ، ژیان، ڤیان، هەڵۆ، ڕزگار، ڕێککەوت، ڕەهێڵ) لە بەڵگەنامە فەرمییەکانی وەک (پاسپۆرت، کارتی نیشتمانی، فۆڕمی خۆراک) بە فۆنتی عەرەبی دەنووسران و دەگۆڕدران بۆ (کالی، زیان، فیان، هلو، رزکار، ریکەوت، رەهیل)، ئەمەش دەنگ و واتای ناوەکانی بە تەواوی دەشێواند، بۆ نموونە ناوێکی وەک (ژیان) کاتێک دەبووە (زیان)، ماناکەی لەدەست دەدا و دەبووە خاوەن واتایەکی نەخوازراو”.
ئاماژەی بۆ ئەوەشکرد “جێگیرکردنی پیتەکانی زمانی کوردی لە سیستمی ئەلیکترۆنیی عیراقدا، هەنگاوێکی مێژوویی و گرنگە بۆ کۆتاییهێنان بە شێواندنی ناوی کوردی لە بەڵگەنامە فەرمییەکاندا، هیواخوازن بتوانن، تەڵاشێک لەسەر دیواری پتەوی فەرهەنگ و زمانی دایک زیاد کردبێت، جێگای خۆیەتی سوپاسێکی تایبەتی ( فەریق سمکۆ- بریکاری وەزارەتی ناوخۆ ) بکەم، کە بەبەردەوامی بۆ ئەم بابەتانەهاوکاریان بووە”.
ب ح
