مهودا میدیا-
دەستەی گشتیی ناوچە کوردستانییەکان وەڵامی لێدوانێکی محەمەد سەمعان، پارێزگارە تورکمانەکەی کەرکووک دەداتەوە کە تێیدا ئاماژەی بە کۆتاییهاتنی ماددەی 140ی دەستووری عیراق کردبوو.
لە راگەیەندراوەکەی دەستەی گشتیی ناوچە کوردستانییەکانی دەرەوەی ئیدارەی هەرێمی کوردستاندا هاتووە “بنچینەی سەرەکیی سیستەمی حکومڕانی لە عیراقی نوێدا دەستووری وڵاتە و بووەتە پەیمانێکی راستەقینە، گەلانی عیراق بە تەواوی جیاوازییەکانیانەوە وەک شانازییەکی گەورەی تێکۆشانیان دژی دەسەڵاتی زۆردار باسی لێوە دەکەن، پابەندبوون بەم دەستوورە تەنیا پابەندییەکی یاسایی و پاراستنی دەستکەوتەکان نییە، بەڵکوو رێزگرتنە لە ویستی گەلانی عیراق”.
باس لهوهشكراوه “خەڵکی کوردستان وەک پێکهاتەیەکی گرنگی ئەم وڵاتە، بە بایەخێکی زۆرەوە و وێڕای تێبینییەکانیان، دەستیان بەم بنەمایەوە گرتووە و وەک بەرهەمی خەباتێکی درێژخایەن وێنای دەکەن، ماددەی 140ـی دەستووریش وەک دیارترین نەخشەرێگە دەبینن بۆ چارەسەرکردنی کێشەیەکی دێرینی نیشتمانەکەیان، ئەویش پرسی ناسنامەی رووبەرێکی بەرفراوانی خاکەکەیەتی لە عیراقدا، هەروەها بڕوایان وایە دەستوور رێگەیەکی هاوسەنگی داڕشتووە بە ئاراستەی چارەسەرکردنی ئەم پرسە لە چوارچێوەی عیراقی فیدراڵدا”.
ههروهها “هەر جۆرە لێدوانێکی نادەستووری لەلایەن پارێزگاری کەرکووکەوە بە تەواوی رەتدەکەینهوه، لەم قۆناغە هەستیارەدا پێویستە پارێزگار گیانی پێکەوەژیانی راستەقینە لە شارەکەدا زاڵ بکات و خۆی لە بەکارهێنانی دەستەواژەیەک بەدوور بگرێت، پێچەوانەی دەستوور و ویستی راستەقینەی گەلانی عیراق بێت”.
ع
