مه‌ودا میدیا-
دۆناڵد ترەمپ، سەرۆکی ئەمه‌ریکا ئه‌مڕۆ یەکشەممە رەخنەی لە ئەنجامی هەڵبژاردنی وڵاته‌كه‌ى گرت، کە تیایدا دیموکراتەکان دەستکەوتی بەرچاویان بەدەستهێنا.
دۆناڵد ترەمپ لە هەژماری تایبەتی خۆی لە تۆڕی کۆمەڵایەتیی (Truth Social) نووسیویەتی “ئەمه‌ریکا هەنگاوێکی زەبەلاحی ناوە بۆ دواوە لە مێژوودا بەهۆی ئەنجامەکانی ئەم دواییەی هەڵبژاردنەکانەوە، ئاماژەی بەوەشکردووە، بازاڕی بۆرسە کە لە ماوەی سەرۆکایەتییەکەیدا موشەکی بەرزبووەتەوە، لە یەک رۆژدا زیانی سێ تریلیۆن دۆلاری بەرکەوتووە.
ئەو پۆستانەی ترەمپ لە تۆڕی کۆمەڵایەتیی تروت سۆشیال ریتویتی کردبوو، پرسیاری لەبارەی ژمارەی دەنگەکانی دیموکراتەکان لەخۆگرتبوو کە لەسەر ئاستی نیشتمانیی و لە ویلایەتی تەکساس بەدەستیان هێناوە، لەنێویاندا پۆستێک کە ئەدای جینا هینۆخۆسا لە کێبڕکێی پارێزگاریدا بە ژمارەی کارتۆن وەسف دەکات.
ئەمەش نوێنەرایەتیی گۆڕانکاری لە تۆنی ترەمپ دەکات بە بەراورد بە هەڵوێستی ترەمپ لە شەوی هەڵبژاردنەکاندا، کاتێک دانی بە شکستدا نا و ئەنجامەکانی قبوڵکرد.
دیموکراتەکان دەستیان بەسەر هەردوو ئەنجومەنی کۆنگرێسدا گرت
دیموکراتەکان لە هەڵبژاردنەکانی رۆژی سێشەممەى رابردوو کۆنترۆڵی هەردوو ئەنجومەنی کۆنگرێسیان بەدەستهێنا، ئەمەش زەربەیەکی گەورەیە بۆ ترەمپ و پارتی کۆمارییەکان لە کاتێکدا خولی دووەمی ترەمپ گەیشتە خاڵی ناوەڕاستی خۆی.
دیموکراتەکان و هاوپەیمانە سەربەخۆکانیان لانیکەم 54 کورسییان لە ئەنجومەنی پیران دەستەبەرکرد، لەکاتێکدا کۆمارییەکان 44 کورسییان دەستەبەرکرد، هێشتا کێبڕکێکانی ئەلاسکا و میسیسیپی یەکلایی نەکراونەتەوە. لە ئەنجومەنی نوێنەران، دیموکراتەکان 254 کورسییان بەدەستهێناوە بەرانبەر بە 162 کورسی بۆ کۆمارییەکان.
ع
