مەودا میدیا-
هاوڵاتییەکی کوردی دانیشتووی بجنوورد و یەکێک لە بریندارە دەستبەسەرکراوەکانی ناڕەزایەتییە سەرتاسەرییەکانی ئێران لەلایەن ناوەندە دادوەرییەکانی کۆماری ئیسلامیی ئێرانەوە سزای هەشت ساڵ زیندانی و لێدانی 80 شەڵاق و دوو ساڵ دوورخستنەوە بۆ شاری خاش-ی بەسەردا سەپێندرا.
رێکخراوی مافی مرۆڤی هەنگاو رایگەیاند “خەلیل رەسوڵی، بە تۆمەتەکانی (هاندان بۆ پشێوی، پڕوپاگەندە دژی کۆماری ئیسلامیی و تێکدانی موڵک و ماڵی گشتیی دادگایی کراوە و ئەو سزایانەی بەسەرداسەپێندراوە”.
ئاماژەی بۆ ئەوەشکرد “خەلیل رەسوڵی لە کاتی ناڕەزایەتییەکان، بە تەقەی هێزە ئەمنییەکان بریندار بوو و پاشان دەستبەسەرکرا، ئەم بەندکراوە سیاسییە کوردە ئێستا لە زیندانی ناوەندیی مەشهەد (زیندانی وەکێڵئاوا) ماوەی سزاکەی بەسەردەبات”.
ئەوەشی خستەڕوو “ناوبراو لە تەواوی ماوەی دەستبەسەری، لێکۆڵینەوە و دادگاییکردنی دادوەریدا لە مافی گرتنی پارێزەر بێبەش بووە و لە ئێستاشدا خزمەتگوزاریی پزیشکیی گونجاوی بۆ دابین نەکراوە”.
ب ح
