مهودا میدیا-
ئیدارەی دۆناڵد ترەمپ زۆر کاردەکات بۆ ئەوەی بەرەیەکی یەکگرتوو لەبارەی شەڕ لەگەڵ ئێران بخاتەڕوو، بەڵام لێدوانەکانی جێگری سەرۆکى ئهمهریكا، جەی دی ڤانس و مارکۆ رۆبیۆ وەزیری دەرەوە لە ماوەی هەفتەی رابردوودا هەندێکجار جیاواز بوون، بەتایبەتی سەبارەت بە ئیسرائیل.
هەفتەی رابردوو ڤانس لە میانی لێدوانەکانیدا لە کۆشکی سپی هێرشی کردە سەر ئەو ئیسرائیلیانەی کە رەخنە لە رێککەوتنی سەرەتایی نێوان ئەمهریکا و ئێران دەگرن.
پێشنیاری کرد کە بۆردوومانکردنی ژێرخانی مەدەنی لە بەیروت لەلایەن ئیسرائیلەوە، هەوڵەکانی ئاشتی بە سەرۆکایەتیی ئەمهریکا تێکدەدات.
لە بەرامبەردا رۆبیۆ بەرگریی لە هەڵمەتی سەربازی ئیسرائیل لە لوبنان کرد و چەندین جار ئۆپەراسیۆنەکانی بە وەڵامێکی رەوا بۆ هێرشەکانی حزبوڵڵای سەر بە ئێران وەسف کرد.
کاتێک پرسیاری لەبارەی رەخنەکانی ڤانسەوە لێکرا، رۆبیۆ خۆی لە وەڵامی راستەوخۆ بەدوور گرت پێش ئەوەی ئاماژە بە هێرشی حزبوڵڵا بکات بۆ سەر خاڵێکی پشکنینی ئیسرائیل لە سەرەتای هەفتەکەدا.
ئەم جیاوازییە تەنانەت لە کاتێکدا کە ئیدارەکە پێداگریی لەسەر یەکگرتوویی دەکات، ئەوە پیشان دەدات کە هەندێک جار جیهانبینی جیاواز سەرهەڵدەدات، ئەمەش دەبێتە تەحەدایەک بۆ کۆشکی سپی کە هاوپەیمانی سیاسییەکەی بە قووڵی لەسەر پرسەکانی سیاسەتی دەرەوە دابەش بووە.
هەروەها وردەکارییەکی پێشوەختە لە داهاتووی پارتی کۆمارییەکان دەخاتەڕوو، چونکە هەردوو رۆبیۆ و ڤانس بە کاندیدی ئەگەری بۆ هەڵبژاردنی سەرۆکایەتیی بۆ ساڵی ٢٠٢٨ دادەنرێت.
هەردوو پیاوەکە هەفتەی رابردوو دەستیان کرد بە گەشتە دەرەکییەکان کە لە نزیکەوە چاودێری دەکران بۆ بەرگریکردن لە رێککەوتنە سەرەتاییەکەی کە لە 17ى حوزەیران لە نێوان واشنتۆن و تاران واژۆکرابوو.
ڤانس بۆ خولێک وتووێژ لەگەڵ کاربەدەستانی ئێران سەفەری سویسرای کرد و رۆژی یەکشەممە لە وتووێژ لەگەڵ رۆژنامەنووسان، تۆنێکی گەشبینانەی دیار سەبارەت بە دانوستانەکان لەگەڵ ئێران لێدا.
لەبەرانبەردا رۆبیۆ لە میانی دیدارێکدا لەگەڵ بەرپرسانی ناوچەکەدا جەختی لەوە کردەوە کە هەر رێککەوتنێک دەبێت پتەو بێت لە پاراستنی بەرژەوەندییەکانی ئەمهریکا و هاوپەیمانەکانی و ڕایگەیاند “ئێمە رێککەوتنمان دەوێت، بەڵام بە هیچ نرخێک رێککەوتنمان ناوێت”.
هەڵوێستی کۆشکی سپی چییە؟
کۆشکی سپی بە توندی رەتیکردەوە هیچ ناکۆکییەک لە نێوان ئەو دوو بەرپرسەدا هەبێت.
ئانا کێلی، وەزیری راگەیاندنی کۆشکی سپی رایگەیاند “یەک کەمپ هەیە، ئۆردوگای سەرۆک ترهمپ. تەواوی ئیدارەکە بە توندی لە پشت هەوڵەکانی سەرۆکەوە وەستاوە بۆ دڵنیابوون لەوەی ئێران هەرگیز چەکی ئەتۆمی بەدەست نەهێنێت”.
ع
