مەودا میدیا- سەركۆ جەمال

هێزەكانی پۆلیسی پارێزگای‌ سلێمانی دوو تۆمەتباری بەرەگەز ئێرانیان دەستگیركرد كە بڕێك پارەی جۆری پێنج هەزاری عیراقی‌ ساختەیان پێبووەو ویستویانە لەناو بازاڕی‌ شاری سلێمانی ساغی بكەنەوە.

لە راگەیەندراوێكی بەشی راگەیاندن و پەیوەندیەكانی پۆلیسی سلێمانی دا كە وێنەیەكی تایبەت بۆ مەودا نێردراوە هاتووە "دوای‌ بەدواداچون‌و چاودێری‌ ورد، توانرا هەردوو تۆمەتبارەكە لەلایەن مەفرەزەكانی‌ بنكەی‌ پۆلیسی‌ سە‌راوە لەپاركی ئازادی دەستگیربكرێن".

پۆلیسی سلێمانی ئەوەشی خستووەتەڕوو "تۆمەتبارەكان ناویان (ل. م. ر) لەدایكبووی‌ 1974 و (ع. م. ح) لەدایكبووی‌ 1976، لەئێستادا بەفەرمانی  دادوەر بەپێی ماددەی 298/280 لەیاسای سزادانی عیراقی راگیراون".