مه‌ودا میدیا-

كۆمپانیاو بانكه‌ جیهانییه‌كان، پێشبینى خۆیان بۆ به‌رزبوونه‌وه‌ى زێڕ له‌ ئه‌مساڵدا زیاتر كردووه‌ و باس له‌وه‌ ده‌كه‌ن، تا كۆتایی ساڵ ئۆنسه‌ى ئاڵتوون به‌شێوه‌یه‌كى به‌رچاو به‌رزده‌بێته‌وه‌.

بڕیاره‌ له‌سه‌ره‌تاى مانگى 12، جارێكى تر بانكى فیدراڵیی ئه‌مه‌ریكا كۆببێته‌وه‌ و بڕیار له‌باره‌ى رێژه‌ى سوو بدات، سه‌ره‌تاى مانگى 11ى ئه‌مساڵ، رێژه‌ى سوو 25 خاڵ كه‌مكرایه‌وه‌، به‌ڵام كاریگه‌ریی له‌سه‌ر به‌رزبوونه‌وه‌ى نرخى ئۆنسه‌ نه‌بوو، بگره‌ به‌شێوه‌یه‌كى به‌رچاو دابه‌زى و دواتریش ده‌ستى به‌ به‌رزبوونه‌وه‌ كرد.

بانكه‌ جیهانییه‌كان پێشبینى ئه‌وه‌ ده‌كه‌ن جارێكى تر بانكى فیدراڵیی ئه‌مه‌ریكا رێژه‌ى سوو به‌ 25 خاڵ كه‌مبكرێته‌وه‌ و بكرێته‌ 3.50، كه‌ ئێستا خۆى 3.75، ئه‌مه‌ش كاریگه‌ریی زۆرى له‌سه‌ر به‌رزبوونه‌وه‌ى نرخى ئۆنسه‌ ده‌بێت.

لاى خۆیه‌وه‌ باس كویجمان،به‌ڕێوه‌به‌رى DHF Capital و سه‌رۆكى ئه‌نجومه‌نى زێڕى جیهانیی به‌ سكاى نیوزى عه‌ره‌بى راگه‌یاند " ئەمساڵ زێڕ به‌ڕیژه‌یه‌كى به‌رچاو به‌رزده‌بێته‌وه‌ و گران ده‌بێت و به‌رده‌وام ده‌بێت له‌ ره‌وتى به‌رزبوونه‌وه‌".

باسى له‌وه‌شكردووه‌ "پێشبینییه‌كان به‌و ئاراسته‌یه‌ن، تا كۆتایی ساڵ، نرخى یه‌ك ئۆنسه‌ى ئاڵتوون دەگاتە 5000 دۆلار".

ئه‌وه‌ش له‌كاتێكدایه‌ ئه‌م هه‌فته‌یه‌ نرخى یه‌ك ئۆنسه‌ بۆ 4230 دۆلار به‌رزبووه‌وه‌ و به‌و نرخه‌ش بازاڕى بۆرسه‌ داخراو ئه‌مشه‌و دووشه‌ممه‌ بازاڕى بۆرسه‌ بكرێته‌وه‌.

ع