مەودا میدیا- سەركۆ جەمال

ژمارەیەك چەكداری داعش كەوتنە بۆسەیەكی هێزەكانی ئاسایشەوە و شەڕوپێكدادان روویدا، لەئەنجامدا دوو چەكداری داعش كوژران و دوو ئەندامی ئاسایش‌ برینداربوون.
بەپێی زانیاریەكانی مەودا میدیا، درەنگانێكی شەوی رابردوو، لە سنووری نێوان شارۆچكەی خورماتوو- شارەدێی نەوجولی سەر بە شارۆچكەی كفری لە سنوری ئیدارەی گەرمیان، شەڕ و پێكدادان لە نێوان هێزەكانی ئۆپەراسیۆنی ئاسایش و چەكدارانی داعش روویدا.

هەر بەپێی زانیاریەكان، هێزەكانی ئۆپەراسیۆنی ئاسایشی سلێمانی بە رێككەوتن لەگەڵ لیوای 52ی سوپای عیراق لە سنووری خورماتوو، بۆسەیەكیان بۆ چەكدارانی داعش داناوە كە ماوەیەكە لەو سنوورە جموجوڵیان دەستیپێكردووە.

بۆسەكە لە نێوان گوندەكانی خدر وەلی و سەمبور و ئاخ چەمەشەتدا‌ دانراوە، كە بە سێ رێیانی خورماتوو- نەوجول - قادر كەرەم ناسراوە، ئۆتۆمبیلێكی جۆری تویۆتای پیكاب كەوتووەتە بۆسەوە و دوو چەكداری داعش كوژراون و دانەیەك بەدیل گیراوە و ئۆتۆمبیلەكەش سووتاوە، هەروەها دوو ئاسایش بە سووكی برینداربوون.

دوابەدوای ئەم ئاڵۆزییانەی شەوی رابردوو، بەرەبەیانی ئەمڕۆ فڕۆكەی هاوپەیمانان بۆردوومانی ئەو سنوروەی كردووە.