مەودا میدیا- 

وەزیری پەروەردەی حکومەتی هەرێم رایگەیاند بڕیاریانداوە بڕە پارەیەک بەشێوەی مانگانە بۆ مامۆستایانی وانەبێژ ببڕنەوە. 

ئالان حەمەسەعید، وەزیری پەروەردەی حکومەتی هەرێمی کوردستان لە راگەیەنراوێکدا ئەوەی خستەڕوو "لە کۆبوونەوەی 1 ی 12 ی 2020ی لیژنەی باڵای رووبەڕووبوونەوەی کۆرۆنا، بە سەرپەرشتی بەڕێز وەزیری ناوخۆی حکومەتی هەرێمی کوردستان، بەندە و بەڕێز وەزیری دارایی راسپێردراین کە لە پشووەکانی ناوەندەکانی خوێندن بەهۆی ڤایرۆسی کۆرۆنا، کۆنووسێک سەبارەت بە شایستە داراییەکانی وانەبێژانی دانەمەزراو بۆ ئەنجومەنی وەزیران بنێرین". 

ئاماژەی بەوەکردووە "پاش کۆبوونەوەی هاوبەشی وەزارەتمان و وەزارەتی دارایی، بە سوپاسەوە لەلایەن جەنابی سەرۆکی حکومەتی هەرێمی کوردستانەوە بەڕێز مەسرور بارزانی، پێشنیازی هەردوو وەزارەت پەسەندکرا". 

روونیشیکردووەتەوە "بڕیاردرا بۆ مانگەکانی 10 و 11 و 12 ی ساڵی 2020 بڕە پارەیەکی بڕاوەی مانگانە ( مقطوع) وەک شایستەی دارایی مامۆستایانی وانەبێژی دانەمەزراو خەرج بکرێت". 

بەگوێرەی راگەیەنراوەکە خەرجکردنی بڕە پارەکە بەم شێوەیەی خوارەوە دەبێت: 

هەڵگری بڕوانامەی بەکالۆریۆس و سەروتر بە بڕی (300000) سێ سەد هەزار دینار. 

هەڵگری بڕوانامەی دبلۆم (250000) دوو سەد و پەنجا هەزار دینار.