مەودا میدیا-

 لە ماوەی ساڵی رابردوو 2020دا دەیان هاوڵاتیی کورد لە شارە جیاوازەکانی کوردستان کۆتاییان بە ژیانی خۆیان هێناوە کە هۆکاری زۆربەیان کێشەی خێزانی و هەژاری و بێکاری بووە.

بە پشتبەستن بە ئاماری تۆمارکراو لە ناوەندی ئاماری رێکخراوی مافی مرۆڤی هەنگاو، لە ماوەی ساڵی 2020 لانیکەم 225 هاوڵاتی کە لە (103 ژن و 122 پیاو) پێکهاتوون لە شارە جیاجیاکانی کوردستان کۆتاییان بە ژیانی خۆیان هێناوە کە 45 حاڵەتی واتە 20%ی کۆی حاڵەتەکان مێرمنداڵ و تەمەنیان خوار 18 ساڵ بووە.

ئاماژە بەوەشکراوە، زیاترین خۆکوشتن لە پارێزگای سنە تۆمار کراوە کە 77 حاڵەت بووە و هۆکاری زۆربەی خۆکوشتنەکانیش کە 114 حاڵەت بووە، کێشەی خێزانی بووە.

ئەوەشخراوەتەڕوو، لە ماوەی ساڵی رابردوودا لانیکەم سێ کچ بەهۆی بە شوودانی زۆرەملێ خۆیان کوشتووە و نزیەکی 70%ی کۆی حاڵەتەکانی خۆکوشتن (156 حاڵەت) لە رێگەی خۆهەڵواسینەوە کۆتاییان بە ژیانی خۆیان هێناوە.

س.س