مەودا میدیا-  

بەدرییە ئیسماعیل، بڕیاردەری لیژنەی مافەکانی مرۆڤ لە پەرلەمانی کوردستان بە مەودا میدیای راگەیاند لیژنەکەیان سەرقاڵی ئامادەکردنی راپۆرتێکە لەسەر ئەو توندوتیژیانەی کە لە ئەنجامی خۆپیشاندانەکانی ئەم دواییەی بەشێک لە شار و شارۆچکەکانی کوردستان ئەنجامدرا.

ناوبراو ئاماژەی بەوەکرد کە بەهۆی پشووی زستانەی پەرلەمان و سەرقاڵی لیژنەکان بە ئامادەکردنی پڕۆژە یاسا بۆ وەرزی داهاتووی یاسادانان، کارەکانی ئامادەکردنی راپۆرتەکە کەمێک دواکەوتووە.

وتیشی "هەموو هەوڵ دەدەین کە بەزوترین کات راپۆرتەکە ئامادە بکرێت و راستیی رووداوەکانی تێدا بخرێتەڕوو".

ئاماژەی بەوەشکرد "دوای تەواوبوونی، راپۆرتەکە ئاراستەی سەرۆکایەتی پەرلەمان دەکرێت و دواتر لە پەرلەمان بڕیاری پێویستی لەبارەوە دەدرێت".

لە کۆتا مانگی ساڵی رابردوودا لە چەند شار و شارۆچکەیەکی هەرێمی کوردستان خۆپیشاندان بەڕێوەچوو و بەهۆی ئەو ئاڵۆزیانەی لە کاتی خۆپیشاندانەکاندا دروستبوون ٩ کەس لە خۆپیشاندەران کوژران.

 ب.م