مەودا میدیا-

لە کۆبوونەوەی ئەمڕۆی ئەنجومەنی ئاسایشی نیشتیمانیی عیراقدا، داوای روونکردنەوەی روون و راشکاو لە ئێران کراوە، لەسەر هێرشەکانی تاران بۆ سەر هەولێر.

لە راگەیەندراوێکدا نووسینگەی سەرۆک وەزیرانی عیراق ئاماژەی بەوەکرد، مستەفا کازمی، فەرماندەی گشتیی هێزە چەکدارەکان و سەرۆک وەزیران بۆ لێکۆڵینەوە لە هێرشەکەی سەر هەولێر کە بە هۆیەوە زیانی بە دانیشتووانی شارەکە گەیاند لەگەڵ ئەنجومەنی ئاسایشی نیشتیمانی کۆبووەتەوە.

لە راگەیەندراوەکەدا ئەوەش هاتووە، ئەنجومەنەکە ئیدانەی هێرشەکە دەکات و لەبارەی هێرشەکانیشەوە داوای روونکردنەوەیان لە تاران کردووە.

ئەوە لەکاتێکدایە بەرەبەیانی ئەمڕۆ یەکشەممە، چەندین مووشەک ئاراستەی کونسوڵخانەی نوێی ئەمەریکا لە هەولێر کرا و بەهۆیەوە زیان بەر ناوچەکانی دەوورووبەری کونسوڵخانەکە گەیشت، هەر ئەمڕۆش ئێران بەرپرسیارێتی خۆی لە هێرشەکان راگەیاند.

ر. ئ.