مەودا میدیا-

سەرۆکی ھاوپەیمانیی دەوڵەتی یاسا بە باڵیۆزی تورکیای لە بەغدا راگەیاند، عیراق دەستوردانەکان لە کاروباری ناوخۆی وڵاتەکەی رەتدەکاتەوە، داوای لە تورکیاش کرد، رۆڵی نەبێت لەو پرۆژانەی دەبنە ھۆی بەرپابوونی قەیران و پێکھاتەیەکی دیاریکراو بکاتە ئامانج.

لە راگەیەندراوێکدا کە ھاوپەیمانیی دەوڵەتی یاسا بڵاویکردەوە هاتووە "نوری مالیکی، سەرۆکی ھاوپەیمانیی دەوڵەتی یاسا  لە کۆبوونەوەی لەگەڵ عەلی رەزا، گونای باڵیۆزی تورکیا لە عیراق، گفتوگۆیان کردووە دەربارەی پێشھاتە سیاسی و ئەمنییەکان لە وڵاتدا".

بە گوێرەی راگەیەندراوەکە مالیکی جەختیکردووەتەوە، لە بنیاتنانی پەیوەندیی بەھێز لەگەڵ تورکیا و گەشەپێدانی بەشێوەیەک کە لە بەرژەوەندی عیراق دەبێت، هاوکات مالیکی داوای لە باڵیۆزی  تورکیا کردووە، نابێت ئەنقەرە رۆڵی ھەبێت لە ھیچ پرۆژەیەکدا، کە ببێتە ھۆی بەرپابوونی قەیران لە عیراق، نابێت پێکھاتەیەکی دیاریکراو بکاتە ئامانج.

ئەوەشی خستووەتەڕوو، پێویستە چارەسەری قەیرانی سیاسی لە عیراقدا بە تەوافوق دەستپێبکات و دەستوەردانە دەرەکییەکان بوەستێندرێت، کە بە ئاراستەی سەرخستنی لایەکە بەسەر لایەکی دیکەدا.

ر. ئ.