مەودا میدیا-

دوای ئەوەی ئەنجومەنی وەزیرانی عیراق فەرمانیکرد بە تەمویلکردنی مووچەی مووچەخۆرانی هەرێمی کوردستان، بەڵام ئەمڕۆ پارەی مووچە رەوانەی هەرێم نەکراو کەوتە هەفتەی داهاتوو.

سەرچاوەیەک لە وەزارەتی دارایی و ئابووری هەرێم رایگەیاند "بەهۆی گرفی نەختینە، پارەی پێویست لەبەردەست وەزارەتی دارایی عیراقدا نییە تاوەکو مووچەی فەرمانبەرانی هەرێم و خانەنشینانی عیراق خەرج بکات".

ئاماژەی بۆ ئەوەشکرد "وەزارەتی دارایی عیراق نووسراوێکی ئاڕاستەی بانکی ناوەندی عیراق کردووە بۆ ئەوەی پارە بۆ مووچەی فەرمانبەرانی هەرێم و خانەنشینی عیراق دابینبکات، بەڵام نووسراوەکە پێویستی بە واژۆی تەیف سامی هەیە و ئەویش لە نەمسایە و نەگەڕاوەتەوە".

ئەوەشی خستەڕوو "هیچ کێشەیەک لەبەردەم ناردنی پارە بۆ هەرێم نییە ، ئەگەر ئەمڕۆ کێشەکە چارەسەر نەکرێت ، بەهۆی پشووەکەی سبەینێ رەوانەکردنی مووچەی فەرمانبەرانی هەرێم دەکەوێتە هەفتەی داهاتوو".

لەلایەکی ترەوە فوئاد حسێن، وەزیری دارایی عیراق رایگەیاند "بەهۆی دابەزینی نرخی نەوت بەغدا رووبەڕووی کورتهێنان و نەبوونی پارەی نەختینە بووەتەوەو هەوڵی چارەسەرکردنی دەدرێت".

ئاماژەی بۆ ئەوەشکرد "گرفت لە ناو و زانیاریی لە لیستی مووچەی فەرمانبەرانی هەرێم هەبووەو ئەم کێشانە بەردەوامیان دەبێت لەنێوان هەرێم و بەغدا بەڵام چارەسەری دەکەن".

ب ح