مەودا میدیا- سەركۆ جەمال

بڕیارە سبەینێ سەرۆكی حكومەتی هەرێمی كوردستان و جێگرەكەی لە سلێمانی بەردی بناغەی پرۆژەی شەقامی سەد مەتری دابنێن.

لەوبارەیەوە، سەرچاوەیەك لە ئەنجومەنی وەزیرانی حكومەتی هەرێمی كوردستان، بە مەودا میدیای راگەیاند، بڕیارە سبەینێ شەممە 11/7/2020 بەمەبەستی دانانی بەردی بناغەی پرۆژەی شەقامی سەد مەتری سلێمانی، مەسرور بارزانی سەرۆكی ئەنجومەنی وەزیرانی حكومەتی هەرێمی كوردستان و قوباد تاڵەبانی جێگری سەرۆكی ئەنجومەنی وەزیران، سەردانی شاری سلێمانی بكەن.

سەرچاوەكە وتیشی، مەبەستی سەردانەكە تەنها بۆ دەستپێكردنی پرۆژەی شەقامی سەد مەترییە لە سلێمانی.

 لە مەراسیمەكەدا جگە لە سەرۆكی حكومەت و جێگرەكەی، وەزیری شارەوانی و پارێزگاری سلێمانی و ئەنجومەنی پارێزگا و بەشێكی دیكە لە بەرپرسانی حكومی ئامادە دەبن.

بڕیارە مەراسیمەكە كاتژمێر 2 ی پاشنیوەڕۆ دەستپێبكات و  كاتژمێرێك بخایەنێت ، دانانی بەردی بناغەكەش لە تەنیشت پردی سەرەكی شەقامی تاسڵوجە دەبێت.

دوای ساڵێك لەدەست بەكاربونی وەك سەرۆكی حكومەت بۆیەكەم جارە مەسروور بارزانی، سەرۆكی حكومەتی هەرێمی كوردستان سەردانی پارێزگای سلێمانی بكات.