مەودا میدیا- سازگار ئەحمەد

بەرپرسی تەندروستی ئاکرێ رایگەیاند لە سنووری قەزای ئاکرێ سێ حاڵەتی ڤایرۆسی "H1N1" کە ناسراوە بە ئەنفلوەنزای بەراز تۆمار کراوە و ئاماژەی بەوەشکرد یەکێک لە نەخۆشەکان نێردراوەتەوە ماڵەوە.

سەباح زوهێر، بەرپرسی راگەیاندنی تەندروستی ئاکرێ بە مەودا میدیای راگەیاند "بەپێی دواین ئاماری تەندروستی ئاکرێ سێ حاڵەتی توشبووی ڤایرۆسی (H1N1) ناسراو بە ئەنفلوەنزای بەراز تۆمار کراوە".

ئاماژەی بەوەشکرد "توشبووەکان دووانیان گەنجە و یەکێکیان ژنە، کە لە ئێستادا ژنەکە لە نەخۆشخانەیە و جێگەیەکی تایبەتی بۆ تەرخانکراوە و چارەسەری بۆ دەکرێت".

سەباح زوهێر وتیشی "یەکێک لە نەخۆشەکان نێردراوەتە ماڵەوە باری تەندروستی جێگیر بووە و ئەوەی دیکەشیان رەوانەی شاری دهۆک کراوە".