مەودا میدیا- سازگار ئەحمەد

رۆژ بەرۆژ ژمارەی تووشبووانی کۆرۆنا لە قەزای شەقڵاوەی سەر بە پارێزگای هەولێر روو لە  زیادبوونە، ، بەرپرسی راگەیاندنی تەندروستیی شەقڵاوە ئاماژە بەوەدەکات ئامارەکان رووی لەهەڵکشانە لە قەزاکە.

محەمەد ئامۆکەیی، بەرپرسی راگەیاندنی تەندروستیی شەقڵاوە بە مەودا میدیای راگەیاند "رێژەی تووشبووانی ڤایرۆسی کۆرۆنا لە قەزای شەقڵاوەی سەر بە پارێزگای هەولێر 600 کەسی تێپەڕاندووە".

ئاماژەی بەوەشکرد "لەو 600 کەسە 30 کەسیان بەهۆی تووشبوونیان بە کۆرۆناوە گیانیان لەدەستداوە و بەشێکی دیکەشیان چاکبوونەتەوە لە پەتاکە".

بەرپرسی راگەیاندنی تەندروستیی شەقڵاوە باسی لەوەشکرد "رۆژانەش بەردەوام هاوڵاتییان دێن پشکنین دەکەن"، باسی لەوەشکرد "ئامارەکان رووی لەهەڵکشانە لەسنوورەکە و زۆرترین رێژەش لە ناحیەی پیرمام و هەریرن".

س.س