مەودا میدیا- سەركۆ جەمال

 وتەبێژی وەزارەتی شارەوانی ‌و گشتوگوزاری حكومەتی هەرێمی كوردستان رایگەیاند لە سەرجەم ‏شارەكان ئەنجوومەنی شارەوانییەكان دروست دەكرێنەوە، باس لەوەشدەكات ئەو ئەنجومەنانە زۆر گرنگن بۆ چەسپاندنی شەفافیەت و بنەبڕكردنی گەندەڵی. 

‏كوردۆ عومەر، وتەبێژی وەزارەتی شارەوانی ‌و گشتوگوزار بە مەودا میدیای وت "دوای رەزامەندیی ئەنجوومەنی وەزیرانی ‏هەرێمی كوردستان لەسەر دروستكردنەوەی ئەنجوومەنی شارەوانییەكان، ‏ئێستا لە هەولێر ‏ئەنجوومەنەكە دروستكراوە ‌و لە شارەكانی دیكەش سەرقاڵی دروست ‏كردنی ئەو ئەنجومەنەن".

 وتیشی "ئەو ئەنجوومەنە ئاگاداری سەرجەم بڕیار‌ و ‏گرێبەستەكانی شارەكە دەبێت و رۆڵی پەرلەمانی شارەكان دەبینێت".

وتەبێژی وەزارەتی شارەوانی و گەشتوگوزاری حكومەتی هەرێم راشیگەیاند "بەپێی ‏پەیڕەوی نوێی ئەنجوومەنی شارەوانییەكان ، 75%ی ئەندامانی ‏ئەنجوومەنەكان لە سەرۆكی فەرمانگە حكومییەكانی شار و ‏شارۆچكەكان پێك دێن و 25%ـیشی لە نوێنەری رێكخراوە ناحكومییەكان ‏و سەندیكا و رێكخراوە پیشەییە تایبەتمەندەكان دەبن".

وەك كوردۆ عومەر ئاشكرایكرد "‏لە هەرێمی كوردستاندا 157 شارەوانی هەن و بوونیان بۆ شارەكان گرنگی خۆی هەیە لەرووی دروستكردنی پرۆژەی خزمەتگوزاری و چاودێریكردنی كاری حكومەت و كۆمپانیاكان".‏