مەودا میدیا- سازگار ئەحمەد

 ئەندامی ئەنجومەنی پارێزگای هەولێر رایدەگەیەنێت دانانی یاریدەدەر بۆ پارێزگاری هەولێر نایاساییە و لە هیچ مادەیەکی یاسای پارێزگاکانی هەرێمی کوردستان ئاماژەی پێنەدراوە، ئاماژەی بەوەشکرد نابێت  لە پارێزگار لە دوو جێگر زیاتری هەبێت.

نـیـار عـوزێـری، ئەندامی ئەنجومەنی پارێزگای هەولێر لەبارەی دانانی یاریدەدەرێک  بۆ پارێزگاری هەولێر بە مەودا میدیای راگەیاند "بەپێی مادەی هەژدەم لە برگەی چوارەم لە یاسای ژمارە 3ی ساڵی 2009 یاسای پارێزگاکانی هەرێمی کوردستان، هاتووە (هەر پارێزگارەو دوو جێگری دەبێت کە بروانامەی زانکۆیان هەبێت و خاوەن شارەزایی و پسپۆڕی بن و بەپلەی بەرێوەبەری گشتی دەبن و فەرمانی دامەزراندنیان لە ئەنجومەنی وەزیرانەوە دەردەچێت)".

ئاماژەی بەوەشکرد "بەپێی مادەی شەشەم برگەی دوازدەیەم بەشی یەک لە هەمان یاسا، پێویستە هەردوو جێگری پارێزگار هاوشێوەی پارێزگار متمانەی زۆرینەی ژمارەی ئەندامانی ئەنجومەنی پارێزگا بەدەست بێنن".

ئەوەشی خستەڕوو "تا ئێرە رێکارەکانی دانانی پارێزگاری هەولێر و هەردوو جێگرەکەی یاساین، ئەوەی نایاسایە و جێگای سەرسورمانە دانانی یاریدەدرێک بۆ پارێزگاری هەولێر، کە لە هیچ مادە و برگەیەکی یاسای ژمارە 3ی ساڵی 2009 ئاماژەی بە دانانی یاریدەدەر بۆ پارێزگار نەکردووە، تەنانەت بەپێی یاساکەش دەسەڵاتی نەداوەتە پارێزگار بۆ ئەوەی یاریدەدەرێک بۆ خۆی دانێت".

س.س