مەودا میدیا-
دەزگای ئاسایشی هەرێمی کوردستان ئاشکرایکرد کە لە دوو چالاکیی جیاوازدا بە هەماهەنگی لەگەڵ ئاسایشی هەولێر و بەڕێوەبەرایەتیی ماددە هۆشبەرەکانی حکومەتی فیدراڵ، سێ بازرگانی بیانیی ماددەی هۆشبەریان دەستگیرکردوە و دەستیشیان بەسەر 12 کیلۆگرام ماریوانادا گرتووە.
دەزگای ئاسایشی هەرێم رایگەیاند “لە چالاکیی یەکەمدا کە لە 2026/5/21، ئەنجامدراوە، دوای بەدواداچوونی ورد، تۆمەتبارێکی بیانی لە شاری سلێمانی دەستگیر کراوە کە پێنج کیلۆ و 200 گرام ماریوانەی پێبووە، و لە کاتی لێکۆڵینەوەکانیشدا دەرکەوتووە کە بڕی پێنج کیلۆ و 500 گرامی تری لە ماڵەکەی خۆیدا لە شارۆچکەی حاجی ئۆمەران شاردووەتەوە، کە دەستبەجێ دوای پەیوەندیکردن بە ئاسایشی هەولێرەوە دەست بەسەر ئەو بڕە شاراوەیەدا گیراوە و کۆی گشتیی بارەکەی گەیشتووەتە 10کیلۆ و 700 گرام”.
ئاماژەی بۆ ئەوەشکرد “لە بە چالاکیی دووەمیشدا، هەر لە هەمان رۆژدا هێزەکانی بەڕێوەبەرایەتیی نەهێشتنی ماددە هۆشبەرەکان بە هاوکاریی بەڕێوەبەرایەتیی ئاسایشی بازگەکان لە سنووری پارێزگای سلێمانی، دوو تۆمەتباری تری بیانییان دەستگیرکردووە کە بڕی یەک کیلۆ و 300 گرام ماریوانایان پێ بووە و بەنیاز بوون بازرگانیی پێوە بکەن”.
ئەوەشی خستەڕوو “لە ئێستادا سەرجەم تۆمەتبارە دەستگیرکراوەکان بەپێی ماددەی (25) لە یاسای ماددە هۆشبەرەکان و کارتێکەرە ئەقڵییەکان راگیراون، و پەڕاوی لێکۆڵینەوەی یاساییان بۆ کراوەتەوە و دۆسییەکانیان لەژێر لێکۆڵینەوەی چڕدایە”.
ب ح
