مەودا میدیا-

لایەنگرانی میلیشیا شیعەكانی عیراق، بێ گەڕانەوە و وەرگرتنی رەزامەندیی لایەنە پەیوەندیدارەكانی حكومەتی عیراق، ناوی شەقامێكی سەرەكی لە بەغدا دەگۆڕن.

بەپێی سەرچاوەكانی هەواڵی عیراقی بەشێكی زۆر لە لایەنگرانی میلیشیا شیعەكان ناوی شەقامی سەرەكيی فڕۆكەخانەی بەغدای پایتەختی عیراقیان بۆ "شەقامی ئەبو مەهدی موهەندیس" گۆڕیوە.

لەئێستادا مستەفا كازمی، سەرۆك وەزیرانی عیراق دەیەوێت رووبەڕووی بەشێكی زۆر لە میلیشیا شیعەكان ببێتەوە، بەهۆی هێرشكردنە سەر باڵیۆزخانەی ئەمەریكا و دروستكردنی مەترسی لەسەر نێردە دیپلۆماسییەكان.

هەروەك جموجوڵی میلیشیا شیعەكان و وروژاندنی شەقام هاوكاتە لەگەڵ نزیكبوونەوە لە ساڵڕۆژی كوشتنی قاسم سولەیمانی، فەرماندەی پێشووی فەیلەقی قودسی ئێرانی و ئەبو مەهدی موهەندیس، جێگری سەرۆكی دەستەی حەشدی شەعبی كاتێك رۆژی 3ی كانونی دووەمی 2020 لەلایەن فڕۆكە بێ فرۆكەوانەكانی ئەمەریكاوە كرانە ئامانج و كوژران.