مەودا میدیا-

سەرۆك وەزیرانی كاربەڕێكەری لوبنان رایدەگەیەنێت بەرپرسانی وڵاتانی رۆژئاوا پێیان وتووە بە "بڕیاری نێودەوڵەتی" هاوكاریكردنی لوبنان راگیراوە و هۆكارەكەشی بوونی حزبوڵڵایە لەو وڵاتە.

حەسان دیاب، سەرۆك وەزیرانی كاربەڕێكەری لوبنان لە چاوپێكەوتنێكیدا لەگەڵ ئاژانسی هەواڵی رۆیتەرز وتی "ئەمەریكی و ئەوروپییەكان پێیان وتم هاوكاری نەكردنی لوبنان بەهۆی تۆوە نییە، بەڵكو بە بڕیارێكی نێودەوڵەتی ئەو كارە راگیراوە، چونكە كێشەیان لەگەڵ حزبوڵڵا هەیە".

دیاب بە یارمەتی حزبوڵڵا بووە سەرۆك وەزیرانی لوبنان و دواتریش بەهۆی تەقینەوەی بەندەری بەیروت لە مانگی ئابی رابردوو، دەستیلەكاركێشایەوە و لەئێستادا وەكو سەرۆك وەزیرانی كاربەڕێكەری لوبنان بەردەوامە تا دەستنیشانكردنی سەرۆك وەزیرانێكی نوێ بۆ وڵاتەكەی.