مەودا میدیا-

ئەندامێکی پەرلەمانی کوردستان باس لە هۆکاری دابەشنەکردنی مووچەی لیوا هاوبەشەکانی پێشمەرگە دەکات و دەڵێت "هۆکاری دابەشنەکردنی مووچەکانیان بۆ ئەوە دەگەڕێتەوە کە تائێستا هاوپەیمانان تەمویلی وەزارەتی پێشمەرگەیان نەکردووە".

کاوە عەبدولقادر، پەرلەمانتاری نەوەی نوێ لە پەرلەمانی کوردستان لە لاپەڕەی تایبەتی خۆی لە تۆڕی کۆمەڵایەتیی فەیسبووک دەشڵێت "بەهۆی دەستبەکاربوونی حکومەتی نوێی ئەمەریکا و گۆڕانکاری لەکابینەکە و تەواونەبونی هەندێ رۆتینیات کە رەنگە لەداهاتوویەکی نزیک تەواو ببێت".

دەقی نووسینەکەی کاوە عەبدولقادر، پەرلەمانتاری نەوەی نوێ لە پەرلەمانی کوردستان:
بۆچی مووچەی لیوا هاوبەشەکانی پێشمەرگە  تائێستا دابەشنەکراوە؟
لەچەند رۆژی رابردوو ژمارەیەکی زۆر پێشمەرگەی ئازیز لەلیوا هاوبەشەکان پەیوەندییان کردووە داوایان کردووە بەدواداچوون بکەم سەبارەت بەمووچەکانیان کە بۆچی وەزارەتی پێشمەرگە تائێستا مووچەی ئەو لیوایانەی دابەشنەکردووە لەکاتێکدا بڕیار بوو سێ مووچەیان بەسەر یەکەوە پێبدرێت؟

دوای بەدواداچوونم بۆ کێشەی مووچەی ئەو پێشمەرگە بەڕێزانە بۆم دەرکەوت هۆکاری دابەشنەکردنی مووچەکانیان بۆ ئەوە دەگەڕێتەوە کە تائێستا هاوپەیمانان تەمویلی وەزارەتی پێشمەرگەیان نەکردووە ئەمیش بەهۆی دەستبەکاربوونی حکومەتی نوێی ئەمەریکا و گۆڕانکاری لەکابینەکەو تەواونەبوونی هەندێ رۆتینیات کە رەنگە لەداهاتوویەکی نزیک تەواو ببێت.

بەڵام ئەوەی جێگای سەرنجە حکومەتی هەرێم خۆی لە پێدانی مووچەی ئەو لیوایانە بێبەری کردووە و ئامادە نییە لە بودجەی حکومەت مووچەیان پێ بدات، بەڵکو چاوەڕێی هاوکاریەکەی هاوپەیمانان دەکات وەک ئەوەی ئەم لیوایانە سەر بە هاوپەیمانان بن نەک هەرێم!!!
لەچەند رۆژی رابردوو لیژنەی پێشمەرگە لە پەرلەمانی کوردستان لەگەڵ هاوپەیمانان کۆبوونەتەوەو داوایان کردوە کە هاوکاری یەکەکانی حەفتاوهەشتا بکەن، وەفدەکەی هاوپەیمانان رایانگەیاندوە ئەگەر پارتی و یەکێتی دەستبەرداری ئەو هێزانە ببن وبیخەنە سەر وەزارەتی پێشمەرگە ئەوان ئامادەن هاوشێوەی لیواهاوبەشەکان هاوکاری ئەو یەکانەش بکەن لەدابینکردنی مووچە و چەک و پێداویستی سەربازی.

کاوە عەبدولقادر، پەرلەمانتاری نەوەی نوێ لە پەرلەمانی کوردستان