مەودا میدیا-

ئەمڕۆ سێشەممە فرۆكە جەنگییەكانی توركیا بنکەیەکی تەندروستییان لە گوندی سكێنی لە قەزای شنگال سێ جار بۆردومان کردووە  و شەهید و بریندار هەیە.

میدیاکانی نزیک لە پەکەکە رایانگەیاند، دوانیوەڕۆی ئەمڕۆ کاتژمێر 1:30 فڕۆکە جەنگییەکانی تورکیا بنکەیەکی تەندروستییان لە گوندی سکێنی سەر بەقەزای شنگال بۆردومانکردووە و دوای ئەوەی خەڵکی گوندەکە چونە شوێنی بۆردوومانەکە و بۆ ئەوەی بچن بەهانای بریندارەکان و ئەوانەی بوون بەژێر داروپەردووی نەخۆشخانەکەوە دوو جاری دیکە فۆڕۆکەکان بردۆمانیانکردووەتەوە و بە پێی زانیارییە سەرەتاییەکان ژمارەیەک کەس شەهید و برینداربوون.

هاوکات لەو بارەیەوە حەیدەر شەشۆ، فەرماندەی هێزی پاراستنی ئێزیدخان بە مەودا میدیای رایگەیاند، بە وردی زیانەکان دیارنین، بەڵام زانیاریمان پێ گەیشتووە کە ژمارەیەک شەهید و بریندار هەن، چونکە ئەو بنکە تەندروستییە ئەمڕۆ کۆبوونەوەیەکی پەکەکەی تێدابووە و لەو کاتەدا فڕۆکەکانی تورکیا بنکەکەیان کردووەتە ئامانج  و دواتریش هاوڵاتییانی گوندەکە کاتێک ویستویانە بچن بەدەم بریندارەکانەوە دوو جاری دیکە فڕۆکەکان بۆردومانی شوێنەکەیان کردووەتەوە .

ئاماژەی بەوەشکرد، ئەو بنکە تەندروستییە پێشتر خوێندنگەبووە و لە لایەن پەکەکەوە کراوە بە بنکەی تەندروستی و ئەمڕۆ لە لایەن فڕۆکەکانی تورکیاوە کراوەتە ئامانج و سێ ئۆتۆمبێلیش سوتێندراوە.

ئەوە لە کاتێکدایە دوێنێ دووشەممە لە ئەنجامی بۆردومانێکی دیکەی فڕۆکەکانی تورکیا لە ناوەندی قەزای شنگال سەعید حەسەن سەعید بەرپرسی سەربازی پەکەکە و برازایەکیشی کە لەگەڵی بووە شەهیدبوون و سێ ئەندامی دیکەی پەکەکە برینداربوون.

ر. ر