مەودا میدیا-

ئەمڕۆ هەینی لە کاتی چونیان بۆ بەشداریکردن لە دەنگدان پاسێک کە پۆلیسی فیدراڵی گواستووەتەوە تووشی رووداوی هاتوچۆ بووە و بەو هۆیەشەوە دوو پۆلیسیان گیانیان لەدەستداوە و 30 پۆلیسی دیکەش برینداربوون.

بە پێی زانیارییەکانی مەودا میدیا کە سەرچاوەیەکی تایبەت پێی راگەیاندوین، لە ناحیەی رەشادی باشوری کەرکوک پاسێک لەکاتی گواستنەوەی ژمارەیەک پۆلیسی فیدراڵی تووشی روویداوی هاتوچۆ بووە و بەو هۆیەشەوە دوو پۆلیسیان گیانیان لەدەستداوە و 30 پۆلیسی دیکەش برینداربوون.

هەر بە پێی زانیارییەکان ئەو پاسە ویستویەتی پۆلیسەکان بگوازێتەوە بۆ ئەو بنکەی دەنگدانەی کە دەبێت دەنگی لێبدەن و تووشی ئەو رووداوە بووە.

ئەمڕۆ رۆژی هەینی بەرواری 8ی ئۆکتۆبەری 2021 لە سەرتاسەری عیراق پرۆسەی دەنگدانی تایبەت بۆ هەڵبژاردنی پەرلەمانی عیراق بەڕێوەدەچێت.

لە دەنگدانی تایبەتدا زیاتر لە ملیۆنێک و 550 هەزار کەس بەشداری دەکەن کە ئەوانە لە کارمەندانی هێزە ئەمنییەکان و ئاوارەی ناو کەمپەکان و نەخۆشەکانی ناو نەخۆشخانەکانن.

بۆ پاراستنی سەلامەتی بەڕێوەچوونی پرۆسەکە حکومەتی عیراق نزیکەی 250 هەزار لە کارمەندانی هێزە ئەمنییەکانی خستووەتە حاڵەتی ئامادەباشییەوە.

لە رۆژی دەنگدانی تایبەت و دەنگدانی گشتییشدا هاتوچۆی نێوان پاریزگاکان قەدەغە دەکرێت بەڵام هاتوچۆی ناوخۆیی ناو لەناو پارێزگاکاندا بەشێوەیەکی ئاسایی بەڕێوەدەچێت.

بردنە ژورەوەی ئامێرەکانی پەیوەندی و کامێرا بۆ ناو وێستگەکانی دەنگدان بەهەموو شێوەیەک قەدەغەیە، لە دەنگداندا کارتی زیرەکی بایۆمەتری بەکاردەهێنرێت و دەنگەکانیش بە شێوەی ئەلیکترۆنی جیادەکرێنەوە.

پرۆسەی دەنگدان لە کاتژمێر حەوتی بەیانییەوە دەستیپێکردووە و بڕیارە تا کاتژمێر شەشی ئێوارە بەردەوام بێت.

ر. ر