مەودا میدیا-

پێچەوانەی ئەوەی كە باوە مۆز لەگەڵ شیردا تێكەڵ بكرێت سوودبەخشە، بەشێك لە توێژینەوە تەندروستییەكان جەختدەكەنەوە كە ئەو گیراوەیە زیانبەخشە بۆ تەندروستی.

زۆر لە مرۆڤەكان گرنگییەكی بەرچاو دەدەن بە تەندروستییان و بەوپێیەش خواردن و خواردنەوەكان هەڵدەبژێرن و تەماشادەكەن بزانن كامەیان باشترینە بۆ جەستە و تەندروستییان؛ چونكە باشترین خواردن و خواردنەوەكان ئەوانەن كە رێژەیەكی زۆر مادەی خۆراكی، كانزا و ڤیتامینەكانیان تێدایە.

شیر یەكێكە لەو خواردنەوانەی دەوڵەمەندە بە ڤیتامینەكانی ئەی، بی 6، دی، كەی، لەگەڵ كانزاكانی فسفۆڕ، ماگنیسیۆم و یۆد و زۆر سەرچاوەی خۆراكیی دیكە، بەڵام بەپێی توێژینەوە پزیشكییەكان ئەم خواردنەوە سوودبەخشە بەكاربردنی لەگەڵ هەندێك خواردن و خواردنەوە، رۆڵەكەی دەگۆڕێت و زیاندەبەخشێتە جەستە، وەك؛

1.ماست

خواردنی ماست لەگەڵ شیر پێكەوە دەبێتە هۆی زیانگەیاندن بە سیستمی هەرس و كێشە لە گەدە و هەرس دروستدەكات.

2.ترشەڵۆكەكان

خواردنی ئەو میوانەی ترشەڵۆكیان زۆرە لەگەڵ شیر دەبێتە هۆی ئازار بۆ گەدە و هەندێكجاریش رشانەوە، پێویستە لەنێوان خواردنی ترشەڵۆك و شیر لانیكەم دوو كاتژمێر هەبێت.

3.مۆز

وا باوە خواردنی مۆز لەگەڵ شیر تەندروست بێت، بەڵام پسپۆڕان دەڵێن بەهۆی ئەوەی شیر و مۆز پێكەوە تێكەڵەیەكی قورس دروستدەكەن، دەبێتە هۆی هەستكردن بە ماندوویەتی و درەنگ هەرسدەبن.

4.ماسی

ماسی زۆر بەسوودە بۆ جەستە، بەڵام خواردنی لەگەڵ شیر دەبێتە هۆی كێشە بۆ كۆئەندامی هەرس و هەندێكجار ژەهراویبوونی گەدەی لێدەكەوێتەوە، كێشەی پەیوەست بە پێستیش دروستدەكات.

5.كاڵەك

رێژەیەكی زۆر لە كاڵەك بریتییە لە ئاو، شیریش مادەیەكی نەرمكارە، بۆیە تێكەڵكردن و خواردنی هەردووكیان پێكەوە كێشە لە گەدە دروستدەكات و هەندێكجاریش دەبێتە هۆی سكچوون.

6. بەهارات 

بەهاراتەكان دەبنە هۆی دروستبوونی ترشەڵۆكی گەدە، كاتێك لەگەڵ شیر تێكەڵدەكرێن گەڕانەوەی ترشەڵۆك دروستدەبێت و كردەی هەرسكردن سەختدەكەن.

7. بەرهەمی هەویر و چپس

بسكیت و چپس و بەرهەمەكانی هەویر بە گشتی تینوومان دەكەن، ئەگەر لەبری ئاو شیر بخۆینەوە بۆ شكاندنی تینوویەتی، رێژەی زۆری خوێ دەبێتە هۆی تێكدانی هاوسەنگیی كارەبایی جەستە و هەڵئاوسان و نائارامیی دروستدەكات.

8.خواردنە پڕ لە پرۆتینەكان

لەبەرئەوەی شیر دەوڵەمەندە بە پرۆتین، خواردنەوەی لەگەڵ خواردنەكانی دیكەی پڕ لە پرۆتین وەك گۆشت، هێلكە و فاسۆلیا قورس دەبێت لەسەر گەدە هەرسیان بكات و بەوهۆیەوە ئازار و نائارامیی دروستدەكات.

 

شادان، ع، ع