مەودا میدیا-

سەرۆکی ئەنجومەنی موەلیدە ئەهلییەکان لە پارێزگای هەولێر ئاشکرایکرد بۆ مانگی رابردوو نرخی موەلیدە بەپێی نرخی گازوایل لە بازاڕەکاندا بۆ ناو شاری هەولێر دیاریکراوە.

خۆران خۆرانی، سەرۆکی ئەنجومەنی موەلیدە ئەهلییەکان لە پارێزگای هەولێر رایگەیاند "مانگی رابردوو موەلیدەکان رۆژانە بە تێکڕا نزیکەی حەوت سەعات و نیو کاریان کردووە و نرخی یەک لیتر گازوایل بە 530 دینار دیاریکراوە، بۆ هەر کاتژمێرێک کارکردن 43 دینار و نیو هەژماردەکرێت".

ئاماژەی بۆ ئەوەشکرد "نرخی یەک ئەمپێر لەناو شاری هەولێر لەنێوان (سێ بۆ 12 هەزار و 500 دینار)دایە، ئەو نرخەش بەپێی کاتژمێرەکانی کارکردنی موەلیدە لە گەڕەکەکاندا دەگۆڕێت".

ئەوەشی خستەڕوو "نرخی یەک ئەمپێر لە ناوبازاڕی شاری هەولێر لەنێوان (سێ بۆ چوار هەزار و 500 دینار)دایە، هەروەها رۆژی یەکشەممەی داهاتوو نرخی کارەبای موەلیدەکان لە دەرەوەی شاری هەولێر دیاری دەکرێت".

ب ح