مەودا میدیا-

دەستەی گشتی دەروازە سنوورییەکان رایدەگەیەنێت كۆی ئه‌و داهاته‌ی له‌یه‌ك رۆژدا له‌سه‌رجه‌م ده‌روازه‌ سنورییه‌كاندا به‌ده‌ستهاتوون، زیاتر له‌ پێنج ملیار دینار بووه‌، ئاماژەی بەوەشکراوە ده‌سته‌كه‌ ئاسانكاریی بۆ هاتنه‌ژووره‌وه‌ی هه‌زاره‌ها بارهه‌ڵگری ده‌رمان و كه‌ره‌سته‌ پزیشكییه‌كان وكه‌ره‌سه‌ی خۆراك كردووه‌.

لە راگەیەندراوێکدا ده‌سته‌ی گشتی ده‌روازه‌ سنوورییه‌كان ئه‌مڕۆ سێشه‌ممه‌ 18-8-2020 رایگەیاند "كۆی گشتی ئه‌و داهاته‌ی كه‌ دوێنێ دووشه‌ممه‌ 17/8/2020 به‌ده‌ستهاتووه‌ له‌ناوه‌نده‌ گومرگییه‌كان زیاتر له ‌پێنج ملیار دینار بووه‌".

ئاماژە بەوەشکراوە "ئه‌م داهاته‌ی به‌ده‌ست گه‌یشتووه‌، له‌كاتێكدایه‌ باجی گومرگی له‌سه‌ر زۆربه‌ی كاڵاكان لادراوه‌، هه‌روه‌ها به‌هۆی داخستنی زۆربه‌ی خاڵه‌ سنوورییه‌كان، به‌هۆی په‌تای ڤایرۆسی كۆرۆنا، قه‌باره‌ی هاورده‌كراوه‌كان كه‌مبوونه‌ته‌وه"‌.

لە راگەیەندراوەکەدا ئەوەش هاتووە‌ "ده‌سته‌كه‌ ئاسانكاریی بۆ هاتنه‌ژووره‌وه‌ی هه‌زاره‌ها بارهه‌ڵگری ده‌رمان و كه‌ره‌سته‌ پزیشكییه‌كان وكه‌ره‌سه‌ی خۆراك كردووه‌، ئه‌وه‌ش به‌هه‌وڵ و چاودێری راسته‌وخۆی ئیداره‌ی باڵا به‌مه‌به‌ستی ئاسانكردنی هاتنه‌ژووره‌وه‌ی بارهه‌ڵگره‌كان بۆ وڵات به‌تایبه‌ت كه‌ره‌سه‌ سه‌ره‌كی وخۆراكییه‌كان و ده‌رمانی مرۆیی بۆ ئه‌وه‌ی له‌سایه‌ی ئه‌م قه‌یرانه‌ی ئێستا بگاته‌ ده‌ستی به‌كاربه‌ر".

س.س