مهودا میدیا-
لە ناوەڕاستی مانگی ئایاردا، ئیدارەی دۆناڵد ترەمپ، پەنای بردە بەر رۆڵێكى نهێنی لە رێگەی کوردستانهوه بۆ پەیوەندیی راستەوخۆ لەگەڵ سەرکردایەتیی سوپای پاسدارانی شۆڕشی ئیسلامیی ئێران، ئەمەش لە کاتێکدایە کە واشنتۆن گومانەکانی لە دەسەڵاتی دانوستانکارانی فەرمی لە تاران هەبووە، بەپێی سەرچاوە ئاگادارەکانی ئەو بابەتە کە قسەیان لەگەڵ ماڵپەڕی هەواڵی ئەمهریکی ئەکسیۆس کردووە.
بهپێى راپۆرتێكى ماڵپهڕى ئهكسیۆسى ئهمهریكى، ئەم رووداوە تیشک دەخاتە سەر ئاڵۆزییەکانی دانوستانەکان بە ئامانجی کۆتاییهێنان بە ململانێکان، لە کاتێکدا کە ئیدارەی ئەمهریکا لە خەباتدایە بۆ دەستنیشانکردنی ناوەندیی راستەقینەی دەسەڵات لەناو دامەزراوەی دەسەڵاتداری ئێراندا.
دوابەدوای ئاگربەستی مانگی نیسان و کۆبوونەوەی لوتکە لە ئیسلام ئاباد، واشنتۆن و تاران خەریکی دانوستان بوون، تا سەرەتای مانگی ئایار، کۆشکی سپی پێیوابوو رێککەوتنێک نزیکە، بەڵام لایەنی ئێرانی بۆ زیاتر لە 10 رۆژ وەڵامدانەوەی خۆی دواخست.
ئەم دواکەوتنە گومانی دانوستانکارانی ئەمهریکای زیاتر کرد کە محەمەد باقر قاڵیباف سەرۆکی پەرلەمان و عەباس عیراقچی وەزیری دەرەوە دەسەڵاتی تەواویان نییە و بڕیارەکانیان کەوتۆتە ژێر کاریگەریی سوپای پاسداران.
بەپێی سەرچاوە ئاگادارەکان كه ئهكسیۆ باسیكردووه، رۆژی 10ی ئایار، تولسی گابارد، بەڕێوەبەری ئەوکاتەی سی ئای ئەی، پەیوەندیی بە نێچیرڤان بارزانی، سەرۆکی هەرێمی کوردستان کردووە، بە رەزامەندی ترەمپ و جەی دی ڤانسی جێگری ترهمپ.
ئیدارەى ترهمپ، نێچیرڤان بارزانی بەهۆی شارەزایی بەرفراوانی لە زمانی فارسی و پەیوەندییە نزیکەکانی لەگەڵ کەسایەتییە دیارەکانی تاران و سوپای پاسدارانی ئیسلامیی هەڵبژارد.
برێت مەکگۆرک، راوێژکاری پێشووی سەرۆکایەتی بۆ کاروباری رۆژهەڵاتی ناوەڕاست رایگەیاند “نێچیرڤان بارزانی چارەسەرکەرێکی پراگماتیکی کێشەکانە، ناوبراو لە هەردوو شاری تاران و واشنتۆن ناسراوە، زۆرجار لە کاتی قەیرانەکاندا بانگەوازی بۆ دەکرێت”.
ماڵپهڕى ئهكسیۆس ئهوهشى باسكردووه، بارزانی وەڵامی ئەو داواکارییەی داوەتەوە و مەرجی پەیوەندیی راستەوخۆی لەگەڵ ئەحمەد وەحیدی، فەرماندەی فەیلەقی سوپای پاسدارانی ئێرانی داناوە.
رۆژی 14ى ئایار، بەرپرسێکی سوپای پاسداران بە مۆبایلێکی کۆدکراوەوە گەیشتە نووسینگەی نێچیرڤان بارزانی لە هەولێر، وەحیدی لە میانەی پەیوەندییەکدا بەم تەلەفۆنە دڵنیایی دا بە بارزانی لە پشتیوانی تەواوی سەرکردایەتیی بۆ دانوستانکارانی ئێران، جەختی لەسەر پەسەندکردنی تاران بۆ چارەسەرکردنی قەیرانەکان لە رێگەی دیالۆگەوە کردەوە.
گابارد راستەوخۆ دوای ئەو بانگەوازەی ئێران ئاگاداری وەڵامدانەوەی ئێران بوو و دهست بهجێ کۆشکی سپی له وهڵامى ئێران ئاگاداركردووهتهوه، بهپێى ماڵپهڕه ئهمهریكییهكه.
دوابەدوای وەڵامدانەوەی ئێران، ئیدارەی ئەمهریکا پێشنیازی ئەنجامدانی کۆبوونەوەی نهێنی لە هەولێر کرد، کە دانوستانکاری باڵای هەردوولا لەژێر چاودێری بارزانیدا کۆبکرێتەوە.
بەڵام لایەنی ئێرانی نیگەرانییە ئەمنییەکانی دەربڕیی و ترسی ئەوەی هەبوو کە لەلایەن کارمەندانی هەواڵگری ئیسرائیلەوە بکرێنە ئامانج، ئەمەش دواجار رێگری لە ئەنجامدانی کۆبوونەوەکە کرد.
لە ئێستادا لایەنە هەرێمایەتییەکان، بە دیارترینیان پاکستان و قەتەر، نێوەندگیریی لە نێوان هەردوولادا دەکەن، بەڵام هیچ پێشکەوتنێکی راستەقینە بەدەست نەهاتووە.
چاودێران پێیان وایە کە هەوڵە دیپلۆماسییەکان هێشتا بەهۆی ئاستەنگە پێکهاتەییەکانی پەیوەست بە هەڵوێستەکانی ئێرانەوە ئاستەنگیان لەسەرە و عیراقچیش لەم دواییانەدا رایگەیاند کە هیچ دانوستانێک لە ئێستادا لەگەڵ لایەنی ئەمهریکی بەڕێوە ناچێت.
ع
