مەودا میدیا-
ئەندامێکی پەرلەمانی عیراق ئاشکرایکرد نرخێکی جێگیر بۆ دۆلار پێشنیاز کراوە و بڵاوکراوەتەوە بۆ ئەمەش بانکی ناوەندیی لە گفتوگۆکانی پەرلەمان بەشدار دەبێت کە دواتر بڕیاری کۆتایی لەسەر دەدرێت و بۆ پەسەندکردن دەگەڕێندرێتەوە بۆ لیژنەی دارایی.
د.رێبوار کەریم، ئەندامی پەرلەمانی عیراق رایگەیاند “پەرلەمانی عیراق بڕیاریدا سبەینێ (فالح ساری، وەزیری دارایی) و (نزار ناسر حسێن، پارێزگاری بانکی ناوەندیی) بانگهێشتی لیژنەی دارایی بکرێن”.
ئاماژەی بۆ ئەوەشکرد ” داوا لە حکومەتی هەرێمی کوردستان دەکەن بەپەلە لەسەر سیستەمی (ئەسیکۆدا) لەگەڵ بەغدا رێکبکەوێت، تاوەکو کێشەی زیاتر بۆ پشکی هەرێم لە بودجەدا دروست نەبێت”.
ئەوەشی خستەڕوو “گرێبەستەکان لە عیراقدا دەکرێنە هەمیشەیی، بەڵام هێشتا گفتوگۆ لەسەر ئەوە بەردەوامە کە ئایا گرێبەستەکان لە هەرێم لە چوارچێوەی بودجەی تایبەتی هەرێمدا مامەڵەیان لەگەڵ بکرێت یان نا، سەبارەت بە پشکی هەرێمی کوردستانیش، رێژەی12،7٪دیاری کراوە”.
باسی لەوەشکرد “مووچەی مووچەخۆرانی هەرێمی کوردستان لە بودجەدا جێگیرکراوە و هیچ گرفت و کێشەیەکی بۆ دروست نابێت، تەنها ئەوە ماوە کە حکومەتی هەرێم لیستی مووچە رەوانە بکات تاوەکو بەغدا پارەکە بنێردرێت و لەگەڵ مووچەی مووچەخۆرانی عیراقدا دابەش بکرێت”.
ب ح
