مهودا میدیا-
سێ سەرچاوەی نزیک لە كۆشكى کرێملین بە ئاژانسی رۆیتەرزیان راگەیاندووە، ڤلادیمێر پوتین، سەرۆکی روسیا، بانگەوازەکانی دانوستان بۆ ئاشتیی لەگەڵ ئۆکرانیا رهتدەکاتەوە.
دوو لەو سەرچاوانە کە نەیانویست ناویان ئاشکرا بکرێت، پێشنیاریان کردووە کە پێدەچێت پوتین ململانێکان پەرە پێبدات، کە ئێستا لە پێنجەمین ساڵیدایە.
یەکێک لەو سەرچاوانە کە بەردەوام لەگەڵ سەرۆکی روسیا کۆدەبێتەوە، ئەگەری پەرەسەندنی لە چەند مانگی داهاتوودا بە “زۆر” وەسف کرد.
ئاژانسی رۆیتەرزى ئهمهریكى بڵاویکردەوە، هێرشەکانی ئەم دواییەی ئۆکرانیا بە فڕۆکەی بێفڕۆکەوان بۆ سەر پاڵاوگەکانی نەوت و بەندەرەکانی روسیا، ئیرادەی پوتینی بۆ بەردەوامبوون لە شەڕەکان بۆ ئێستا بەهێزترکردووە.
ئەم پێشهاتانە دوای ئەوە دێت کە دۆناڵد ترەمپ، سەرۆکی ئەمهریکا رۆژی دووشەممە رایگەیاند “پوتین دەیەوێت کۆتایی بە شەڕەکە بهێنێت و چارەسەرێک نزیکترە لەوەی خەڵک بیری لێدەکەنەوە”.
ترەمپ هەفتەی ڕابردوو پەیوەندی تەلەفۆنی جیاوازی لەگەڵ پوتین و هاوتا ئۆکراینییەکەی، ڤۆلۆدیمیر زێلێنسکی ئەنجامدا و رۆژی چوارشەممەش لە لوتکەی ناتۆ لەگەڵ زێلێنسکی کۆبووەوە، کە سەرۆکی ئۆکرانیا رایگەیاند “بیرۆکەکانی نزیککردنەوەی ئاشتییان تاوتوێ کردووە”.
سەرۆکی روسیا لە مانگی حوزەیرانی رابردوودا بە ئاشکرا بانگەوازەکەی زێلێنسکی بۆ کۆبوونەوە و ئاگربەست رەتکردەوە.
دیمیتری پێسکۆڤ، وتەبێژی کرێملین، کاتێک پرسیاری لێکرا وتی “روسیا ئامادەیە بۆ چارەسەری ئاشتیانە، بەڵام توانای پێویستیی هەیە بۆ ئەوەی سەربەخۆ مامەڵە بکات و بەردەوام بێت لە ئۆپەراسیۆنی سەربازی خۆی”.
ع
