مەودا میدیا - کاروان نوری

بەرێوەبەرى گشتى هاتوچۆى سلێمانى رایگەیاند، لە مانگى داهاتوودا، كامێرا جێگیره‌كانی سه‌رپێچی تیژڕه‌ویی له‌ سلێمانی ده‌كه‌ونه‌ كار کە ژمارەیان ٢١ کامێرایە و لە چەند شوێنێکی جیاوازدا دادەنرێن.
 
عه‌مید فه‌ره‌یدون عومه‌ر، به‌ڕێوه‌به‌ری هاتووچۆی پارێزگای سلێمانی بە مەودا میدیای راگه‌یاند "لە مانگی داهاتوودا كامێرا جێگیرەكانی ‏تۆماركردنی سەرپێچی تیژڕه‌ویی لەناو شاری سلێمانی دەكەونە كار، ئەوەشی ئاشکراکرد، لە ‏نێو شاری سلێمانیدا 21 شوێن بۆ دانانی كامێرای جێگیر دیاریكراوە".

به‌ڕێوه‌به‌ری هاتووچۆی سلێمانی روونیشیکردەوە "دانانی ئەو کامێرانە لە پێناو کەمکردنەوەی رووداوەکانی هاتوچۆیە بۆ ئەوەی تیژڕه‌ویی ئۆتۆمبێلەکان لەپێناو سەلامەتی هاوڵاتیان کەمبکەنەوە، وتیشی "ژمارەیەک کامێرای گەرۆکمان هەیە کە رۆژانە 40 لەو كامێرایانە لەناو سنوری پارێزگای ‏سلێمانی بۆ تۆماركردنی سەرپێچییەكان دادەنرێن".

ک.ن