مەودا میدیا- سازگار ئەحمەد

ئەمڕۆ پێنجشەممە 25ی ئاداری 2021 نرخی کیلۆیەک مریشک لە بازاڕەکانی هەرێمی کوردستان بۆ سەر و سێ هەزار و 250 دینار بەرزبووە، جێگری سەرۆكی كۆمەڵەی كێڵگە پەلەوەرییەكانی سلێمانی ئاماژە بە هۆکارەکانی بەرزبوونەوەی نرخی مریشک دەکات.

نازم عەبدوڵڵا، جێگری سەرۆكی كۆمەڵەی كێڵگە پەلەوەرییەكانی سلێمانی بە مەودا میدیای راگەیاند "بەهای دۆلار بەرانبەر بە دیناری عیراقی بەرزبووەتەوە، هەروەها تۆنێک عەلەف 40 بۆ 50 دۆلار گرانبووە، هەروەها ڤیتامینات و غاز و گاز و پێداویستییەکانی دیکەش گرانبوون، چونکە هەموو پێداویستییەکانیش بەدۆلار دەکڕن و نرخیشیان گران بووە، بۆیە نرخی مریشک بەرزبووەتەوە، لەبەرئەوەی بە دینار مریشک دەخەنە بازاڕەوە".

ئاماژەی بەوەشکرد "سێ مانگ پێش ئێستا نرخی جوجکێک 35 سەنت بوو، بەڵام ئێستا بە 80 سەنتە و دەستیشناکەوێت، چونکە ئەوانەی جوجکیش بەرهەم دەهێنن، بەهەمانشێوە لەترسی زیان بەرهەمیان کەمکردووەتەوە".

باسی لەوەشکرد "هەتا 15 رۆژی دیکە ئەگەری هەیە نرخی مریشک 200 دیناری دیکە بەرزببێتەوە یان دابەزێت، دوای ئەوە ماوەیەش نرخی مریشک خۆی دادەبەزێتەوە، چونکە جوجکێکی زۆر کراوەتە پرۆژەکانەوە و چاوەڕێ دەکرێن ببنە مریشک".

س.س