مەودا میدیا- سازگار ئەحمەد

رێگەی کەلار - سلێمانی ناسراو بە "رێگەی مەرگ" ماوەی چەندین ساڵە بەهۆی نەبوونی بودجەوە نەتونراوە پرۆژەی دووسایدکردنی ئەو رێگەیە تەواوبکرێت بە بیانووی قەیرانی داراییەوە، لەئێستادا دووبارە کارکردن تیادا راگیراوە.

عەدنان خەلیل، بەڕێوەبەری رێگەوبانی گەرمیان بە مەودا میدیای راگەیاند "لە 1ی ئاداری 2022وە بە تەواوەتی کارکردن لە پرۆژەی دووسایدکردنی رێگەی کەلار - سلێمانی راگیراوە بەهۆی نەمانی بودجەوە".

ئاماژەی بەوەکرد "چەندین داواکاری پێشکەشکراوە بۆ خەرجکردنی بودجە بۆ پرۆژەکە، بەڵام حکومەتی هەرێمی کوردستان بە بیانووی قەیرانی داراییەوە هیچ بودجەیەک خەرجناکات بۆ پرۆژەکە".

بەڕێوەبەری رێگەوبانی گەرمیان  ئەوەشی خستەڕوو "بۆ تەواوکردنی پرۆژەی دووسایدکردنی رێگەی کەلار - سلێمانی پێویستمان بە زیاتر لە 65 ملیار دینار هەیە".

ماوەی چەندین ساڵە کارکردن لە پرۆژەی دووسایدکردنی رێگەی کەلار - سلێمانی بەردەوامی هەیە، بەڵام بەهۆی خەرجنەکردنی بودجەی پێویستەوە نەتوانراوە کارەکانی پرۆژەکە بە باشی بکرێت، کۆمپانیای جێبەجیکاری پرۆژەکەش دەڵێت "تاوەکو بودجە بۆ پرۆژەکە خەرجنەکرێت دەست بە کاردکردن ناکەینەوە لە پرۆژەکە".

س.ر