راپۆرت

بۆچی حكومەتی كۆماری ئیسلامی ئێران دەنگی ناڕازییەكان نابیستێت؟

مەودا میدیا - سلێمانی |


بۆچی حكومەتی كۆماری ئیسلامی ئێران دەنگی ناڕازییەكان نابیستێت؟
مەودا میدیا-

نوێنەری رابەری كۆماری ئیسلامی ئێران "خامنەیی" لە زانكۆكان، دەڵێت "بەپێی راپرسییەك لەسەدا 80ی خەڵك لە حكومەت ناڕازین".

زیاتر لە 50 رۆژ بەسەر گیانلەدەستدانی ژینا ئەمینی تێپەڕدەبێت، بەرپرسانی باڵای حكومی رێگا چارەی ئاسان و بێسەرئێشە بۆكپكردنی دەنگی ناڕەزایەتییەكان باسدەكەن، ئەویش بێدەنگكردنی ناڕەزایەتییەكانە لەرێگای توندوتیژی و ترس و تۆقاندن و پەلاماردان و دەیانەوێت بەوجۆرە خۆپیشاندەران بێدەنگ بكەن.


سەرەڕای ئەو جۆرە لە مامەڵەكردن، هێشتا كەسانێكی وەكو حسێن شەریعەتمەداری، راوێژكاری رابەری حكومەتی ئێران بڕوای وایە ئەو جۆرە لەمامەڵەكردن كەمە و دەڵێت "پێویستە خۆپیشاندەران وانەیەكیان پێبدرێت كە قەد بیریان نەچێتەوە".
لەلایەكی دیكەوە هەڵسووكەوتی دەسەڵات لەگەڵ خۆپیشاندەران وایكردووە كە بەشێكی دیكەی ناڕازییەكان لە حكومەتی ئێستا، بێنە سەر شەقام و لەگەڵ ئەوانی دیكە درێژە بە خۆپیشاندان بدەن.

ئەگەر چەند هەفتەی پێش ئێستا داواكاری كەسانی وەكو "مەولوود عەبدولحەمید" وتارخوێنی سوونە مەزهەب لە شاری زاهیدان بەسزا گەیاندنی تاوانبارانی "هەینی خوێناویی زاهیدان" بوو  ئەوا ئێستا داواكارییەكانیان زیاترە. ئەو وتاربێژە پێشتر هەوڵی هێوركردنەوەی دۆخەكەی دەدا و یەكێك بوو لەو كەسانەش لەكاتی هەڵبژاردنەكانی ئێران پشتگیری ئیبراهیمی رەئیسی دەكرد، لەئێستادا داوای "ریفڕاندۆم" لەحكومەتی ئێران دەكات.
لەلایەكی دیكەوە بەرپرسانی باڵای حكومی چەندینجار رایانگەیاندووە "ناڕەزایەتییەكان كۆتایی پێهاتووە و باردۆخەكە لەژێر كۆنترۆڵی ئەواندایە". دەشڵێن، حكومەتی ئێران دارێك نیە بەهەموو بایەك بلەرزێت و لەناوبردنی ئەم حكوومەتە خەونێكی بێ ئەقڵانەیە".
لە ئێستادا هیچ هەواڵێك لەسەر "نەرمی نواندن" نییە.

بۆچی حكومەت لە ئاست داواكاریی خۆپیشاندەران نابیست و نابینایە؟
لەلایەكی دیكەوە "موستەفا موحەدسی" مەلایەكی لایەنگری دەسەڵات لە تویتەر بە خۆپیشاندەران دەڵێت "لە دوای دەسەڵاتی كۆماری ئیسلامی ئێران كۆڵانێك نامێنێت كە سەمای تێدا بكەن، چونكە هەمووی دەبێتە وێرانە و دەڕوخێت".

لەرابردوودا زۆربەی چاودێرانی ناوخۆیی و دەرەوەی ئێران هۆشدارییان لەبارەی قەیرانی ئابووری و سیاسی لە ئێران دابوو، یەكێك لەو كەسانە كە پێشبینی باردۆخی ئێرانی كردبوو و لەدەرەوەی وڵاتی ئێران دەژی "مانووك خودابەخشیان" شارەزای یاری تۆپی پێ بوو.

لەدوای هاتنە سەركاری كۆماری ئیسلامی ئێران، وەك چالاكوانێكی سیاسی لەدەروەی وڵاتی ئێران بەشداری لەبەرنامەكانی كەناڵە تەلەڤیزیۆنییەكان كردووە. لەماوەی رابردوودا لەیەكێك لەدیدارەكانیدا دەڵێت، "رۆژێك دایكان و كچانی ئێران یان سەندرێلاكانی ئێران، شەقامەكان پڕدەكەن و حكومەت وەدەر دەنێن".

مانووك دوو ساڵ پێش ئێستا لە لۆس ئەنجلوس كۆچی دواییكرد، لەئێستادا پێشبینییەكەی راست دەرچووە و شەقامەكان لە ژنان و كچان پڕكراون.
لەلایەكی دیكەوە دەوترێت سەرەڕای ئەوەی كە رابەری ئێران و بەشێك لە بەرپرسان دەڵێن خەڵك ناڕازین و پێویستە گوێیان لێبگیرێت، ئیتر بۆچی هەنگاو نانرێت بۆ گوێگرتن لەخەڵك و حكومەت بەرەو چاكسازیی ناڕوات؟ 

هەروەها "سەعید جەلیلی" نوێنەری رابەری ئێران لە ئەنجومەنی باڵای ئەمنی دەڵیت "لەم باردۆخەشدا كە ئابلۆقە لەسەر ئێران هەیە بە پێی پێوسیتی وڵاتەكە بۆ ئیدارەدانی دەتوانن نەوت بفرۆشن". 

هەندێك لە لێپرسراوانی دیكەش دەڵێن "حكومەتی هاوشێوەی ئێران لەبەر ئەوەی پەیوەستن بەداهاتی نەوتەوە، ناڕووخێن".

هادی كەحالزادە، لێكۆڵەر و مامۆستای زانكۆ لە زانكۆی "بارندایز"ی ئەمریكا لە لێدوانێك بۆ بی بی سی دەڵێت "حكومەتی ئێران، حكومەتێكی ئاسایی نیە، لەبەر ئەوەی نیەت و ئامانجی دەوڵەتێكی باش چارەسەركردنی كێشەكانە، لەو حاڵەتانەدا تێبینی و قسەی خەڵك گرنگە، بەڵام ئەولەویەتی ئێران پاراستنی دەسەڵاتی خۆیەتی نەك خەڵك".

دەشڵێت "لەئێستادا حكومەت ئامادە نیە كێشەكانی خەڵك چارەسەر بكات و بەدوای رێگا چارەدا بگەڕێت". وتیشی "حكومەت تەنانەت دەسەڵاتی ئەوەی نیە كۆنترۆڵی نرخی كیلۆیەك پیاز بكات".

لەبەشێك لەقسەكانیدا ئەو مامۆستایەی زانكۆ دەڵێت "ئەوەی ئێستا لە ئێران روودەدات نموونەیەك لە بێ توانایی حكومەت لە خۆنەگونجاندنی لەگەڵ شێوازی ژیانی نوێی خەڵك". دەشڵێت "ئەگەر بابەتی ژینا ئەمینیش رووی نەدایە ئەوا قەیرانی دیكە وەك بێكاری و گرانی و كێشەی ئاو و زۆرشتی تر خەڵكی دەهێنا سەر شەقام". لەكۆتایدا رایگەیاندووە "ئەگەر حكومەتی ئێران كۆتایی بەم خۆپیشاندانانەش بێنێت، بەهۆكار و كێشەی جۆراوجۆری دیكە جارێكی دیكە خەڵك دەڕژێنەوە سەرشەقام".

ك م 

Qaiwan
Qaiwan

زۆرترین خوێندنەوە

بیروڕا



News

توندوتیژی دژی ژنان

لەلایەن نەرمین عوسمان



News

ژن لە نۆڤەمبەر و دیسەمبەردا

لەلایەن ماردین عەبدولکەریم