مه‌ودا میدیا-

بەڕێوەبەرایەتیی گشتیی کارەبای سلێمانی نرخی کارەبای موەلیدەى بۆ مانگى ئاب دیاریكرد و رایده‌گه‌یه‌نێت "نرخی ئەمپێڕێک له‌ نێوان 15 بۆ 16 هه‌زار دینار دایه‌".

لە راگەیەندراوێکدا كه‌ ئەمڕۆ یەکشەممە 4ى ئابى 2024، بەڕێوەبەرایەتییه‌كه‌ بڵاویکردووه‌ته‌وە، ده‌ڵێت "لیژنه‌ی دیاریكردنی نرخی موەلیدە ئه‌هلییه‌كان کۆبووەوە و به‌پێی نرخی سووته‌مه‌نی له‌ بازاڕه‌كاندا نرخی هه‌ر كاتژمێرێك بۆ یه‌ك ئه‌مپێر (42) دینارە،‌ به‌مه‌ش نرخی یه‌ك ئه‌مپێر كاره‌بای موه‌لیده‌ی ئه‌هلی گه‌ڕه‌كه‌كان له‌ ناو شاری سلێمانی له‌نێوان (15.000) بۆ (16.000) دیناره‌".

راشیگه‌یاندووه‌ "موەلیدەکان لە نێوان (365 بۆ 380) کاتژمێر کاریان کردووە، به‌هۆی جیاوازی كارکردنیان نرخی ئه‌مپێرێك له‌ گه‌ڕه‌كێك بۆ گه‌ڕه‌كێكی دیكه‌ جیاواز ده‌بێت".

روونیشیكردووه‌ته‌وه‌ "خشته‌ی كارپێكردنی موه‌لیده‌ بۆ مانگى ئاب (24) كاتژمێریی دەبێت واتە هەركاتێك كارەبای نیشتیمانی كوژایەوە پێویسته‌ موه‌لیده‌كان كارەبا بدەن به‌ هاووڵاتییان".

له‌ راگه‌یه‌ندراوه‌كه‌دا ئه‌وه‌ش هاتووه‌ "لیژنه‌ی دیاریكردنی نرخی موه‌لیده‌ ئه‌هلییه‌كان، له‌كۆنووسه‌كه‌دا جه‌ختیان له‌وه‌ كردووه‌ته‌وه‌ كه‌ له‌ كاتی كوژاندنه‌وه‌ی كاره‌بای نشتیمانی نابێت كارپێكردنی موه‌لیده‌ و پێدانی كاره‌با به‌هاوڵاتییان له‌ (10) خوله‌ك زیاتر بخایه‌نێت، به‌پێچه‌وانه‌وه‌ خاوه‌ن موه‌لیده‌كه‌ سزاده‌درێت".

پ ح ع