ئەمڕۆ دووشەممە، لە یەكەم رۆژی كردنەوەی بازاڕەكانی جیهان، نرخی نەوت بەرزبوونەوەی بەرچاوی بەخۆوە بینی و هۆكارەكەشی بۆ گرژییەكانی رۆژهەڵاتی ناوەڕاست و باشتربوونی داتا ئابوورییەكانی ئەمریكا دەگەڕێتەوە.
 
بەیانی ئەمڕۆ، نرخی نەوتی سووكی تەكساسی ئەمریكا 30 سەنت بەرزبووەوە و بە 77 دۆلار و 18 سەنت مامەڵەی پێوەكرا و نرخی نەوتی برێنتی دەریای باكووریش 20 سەنت بەرزبووەوە و بە 79 دۆلار و 40 سەنت مامەڵەی پێوەكرا. 
 
شارەزایانی ئابووری پێیانوایە ئەگەری تۆڵەكردنەوەی ئێران و حیزبوڵڵا لە ئیسرائیل، هۆكاری سەرەكییە بۆ بەرزبوونەوەی نرخی نەوت لە سەرەتای ئەم هەفتەیەدا.
 
یەكێكیتر لە هۆكارەكانی بەرزبوونەوەی نرخی نەوت ئەوەیە كە وەزارەتی كاری ئەمریكا رایگەیاند، ژمارەی ئەو كەسانەی كە داوای بیمەی بێكارییان كردووە لەو وڵاتە، لە ئاستی هەفتانەدا دابەزیوە و نرخەكانی بەكاربەریش لە چین، بەرزبوونەتەوە. 
ئ.پ .