مەودا میدیا-

ئەمڕۆ هەشت ساڵ تێپەڕ دەبێت بەسەر کۆچی دوایی نەوشیروان مستەفا تێدەپەڕێت، لە 19ی ئایاری 2017دا لە تەمەنی 73 ساڵیدا لە گردی زەرگەتەی شاری سلێمانی کۆچی دوایی کرد بەیانیەکی هەینی بوو، دوای ئەوەی تەنها چەند رۆژێک بوو لە وڵاتی بەریتانیا گەڕابوویەوە شاری سلێمانی کە بەمەبەستی وەرگرتنی چارەسەریی رووی لەو وڵاتە ک،ردبوو لەپڕێکدا هەواڵی کۆچی دوایی رێکخەری گشتیی بزووتنەوەی گۆڕان بڵاوبووەوەو، ئەمەش زۆرێک لە لایەنگران و هاووڵاتییانی هەرێمی کوردستانی دڵتەنگ  کرد.

نەوشیروان مستەفا ئەمین کێیە ؟

نەوشیروان مستەفا لە 22ی کانوونی یەکەمی 1944 لە گەڕەکی سەرشەقامی شاری سلێمانی لە دایکبووە.

قوتابخانەی سەرەتایی و ناوەندی و دواناوەندی لە شاری سلێمانی تەواوكردووە، لە ساڵی 1967 كۆلێژی زانستە سیاسییەكانی لە زانكۆی بەغدا تەواو كردووە، لە سەرەتای ساڵانی شەستەكانی سەدەی ڕابردووەوە لە ریزەكانی یەكێتی قوتابیانی كوردستان چالاكانە كاری كردووە.

گۆڤاری رزگاری كە لە ساڵی 1969 دا دەرچووە، نەوشیروان مستەفا خاوەنی ئیمتیازی ئەو گۆڤارە مانگانەیە بووە.

پاش بەیانی 11ی ئازاری 1970 نەوشیروان مستەفا و کۆمەڵێک هاوڕێی دووردەخرێنەوە لە سلێمانی بۆ خوارووی عیراق و پاشان لە بەغدا یەك دەگرنەوە.

 نەوشیروان مستەفا بەرەو نەمسا بە مەبەستی خوێندن و دووركەوتنەوە لە هەڕەشەكانی ئەو سەردەمەی حكوومەتی عیراقی بە رێدەكەوێت كە لەو سەردەمەدا لەلایەن حكومەتی عێراقییەوە سزای لە سێدارەدانی بۆ دەرچووە.

لە نەمسا پاش تەواوكردنی ماستەر، سەرقاڵی خوێندنی دكتۆرا دەبێت لە بواری یاسای نێودەوڵەتیی، بەڵام بۆ دامەزراندی یەكێتیی نیشتمانیی کوردستان واز لە خوێندنەكەی دەهێنێت و دەگەڕێتەوە كوردستان.

لێرە بەدواوە ئیتر نەوشیروان مستەفا وەك سەركردەیەكی دیار بە تەواوی دەردەكەوێت كە هەم سكرتێری كۆمەڵە و هەم جێگری سكرتێری گشتیی یەكێتیی نیشتمانیی كوردستان دەبێت.

نەوشیروان مستەفا لە ساڵی 1981 لەگەڵ  شوعلە عەلی خێزانی پێكهێناوە، کە تەنها سێ مانگ پێش کۆچیی دوایی خۆی هاوسەرەکەی لە 17ی ئازاری 2017دا کۆچی دوایی کرد.

نەوشیروان مستەفا لە ساڵی 197ەوە تاوەکو ساڵی 2006 لەناو یەکێتیی نیشتمانیی کوردستاندا وەک جێگری سکرتێری گشتیی ماوەتەوەو لە ساڵی 2006  دەستیلەکار کێشایەوە و کۆمپانیای وشەی دامەزراند، کە تایبەت بوو بە کاری راگەیاندن.

دوای جیابوونەوەی لە یەکێتی نیشتیمانی کوردستان، لە ساڵی 2009دا بزووتنەوەی گۆڕانی دامەزراند و بووە رێکخەری گشتیی بزووتنەوەکە.

هەر دوای کۆچی دوایی نەوشیروان مستەفا  کێشەی قوڵ لەناو پڕۆژە سیاسییەکەیدا سەریهەڵدا کە بزووتنەوەى گۆڕانە، چەند مانگێک دوای کۆچی دوایی ئەو، جیابوونەوەی سەرکردە و هەڵسوڕاوەکانی دەستی پێکرد بەهۆی نیگەرانى لە چۆنییەتى بەڕێوەبردنى ئەو بزووتنەوەیە، ماڵ و میراتى نەوشیروان مستەفا کە بەناوی کۆمپانیای وشەوە بوو.

دوای کۆچی دوایی نەوشیروان مستەفا، ناکۆکی قوڵ لەناو گۆڕاندا درووستبوو، سەرکردە و هەڵسوڕاوە دیارەکانى گۆڕان وازیان لە بزووتنەوەکە هێناو، ئەم ناکۆکییانە گەیشتە ئەوەى لە هەڵبژاردنی ساڵی 2018دا گۆڕان 12 کورسی بەدەستهێنا، بەشداریکردنى لە کابینەى نۆیەمی حکومەتی هەرێم، ئەوەندەى تر گۆڕانی هەڵوەراند و لە هەڵبژاردنى تشرینی یەکەمی ساڵی 2024دا گۆڕان تەنها یەک کورسی بەدەستهێنا.

پڕۆژە رۆشنبیرییەکانی نەوشیروان مستەفا:

لە كەناری دانوبەوە بۆ خڕەی ناوزەنگ، دۆخی سیاسی لە كوردستانی عیراق لە سالی1975 تاوەكو 1979، (كوردستان ـ زەرگەتە: 1997)

پەنجەكان یەكتری دەشكێنن، دوخی سیاسی لە كوردستانی عیراق لە ساڵی 1979 تاوەكو 1983، (كوردستان ـ زەرگەتە: 1997)

خولانەوە لە بازنە دا، دوخی سیاسی لە كوردستانی عێراق لە سالی 1984 تاكو 1988، (كوردستان: 1999)

كورد و عەجەم، (كوردستان ـ زەرگەتە: 1992)

حكوومەتی كوردستان: كورد لە گەمەی سوڤیەت دا، (كوردستان: 1993)

میرایەتی بابان لە نێوان بەرداشی ڕوم و عەجەم دا، (كوردستان: 1998)

كوردستانی عیراق: سەردەمی قەلەم و موراجەعات، 1928-1932(كوردستان ـ زەرگەتە: 2000)

ژیان، بەتەمەنترین روژنامەی كوردی 1926 -1938 (كوردستان ـ زەرگەتە 2002)

ژیان، چەند لاپەرەیەك لە مێژووی روژنامەوانیی كوردی 1938 -1958 (كوردستان ـ زەرگەتە:2006)

كارەساتی هەكاری، (كوردستان ـ زەرگەتە: 1981)

كێشەی پارتی و یەكێتی، (كوردستان ـ زەرگەتە: 1995)

ئێمە و ئەوان، (كوردستان ـ زەرگەتە: 2009)

بەدەم ڕێگاوە گوڵچنین، (چوار بەرگ)

ئەدەب و تاریخی كوردی، (كوردستان ـ زەرگەتە: 2012)

ب ح