مەودا میدیا-

دوای دەست لەکارکێشانەوەی عادل عەبدولمەهدی سەرۆک وەزیرانی عیراق موقته‌دا سه‌در، رێبه‌ری ره‌وتی سه‌در  راگەیاندراوێکی بڵاوکردەوە.

موقتەدا سەدر لە راگەیاندراوەکەدا سەبارەت بە دەست لەکارکێشانەوەی سەرۆک وەزیرانی عیراق رایگەیاند "سوپاس بۆ خوا و بۆ شۆڕشگێران، هەروەها سوپاس بۆ مه‌رجه‌عیه‌ت و هه‌موو ئه‌وانه‌ی پشتیوانی و پاڵشتیان كرد، ده‌ست له‌كاركێشانه‌وه‌ی سه‌رۆك وه‌زیران، یه‌كه‌م به‌رهه‌می شۆڕشه‌ نه‌ك دوایین، به‌ڵام ئه‌وه‌ش بزانن كه‌ ده‌ست له‌كاركێشانه‌وه‌ی سه‌رۆك وه‌زیران به‌ واتای كۆتاییهاتنی گه‌نده‌ڵی نییه‌".

سەدر سەبارەت بە دیاریکردنی جێگرەوەی عادل عەبدولمەهدی وتی "پێویسته‌ ئه‌و كاره‌ له‌ رێگه‌ی ریفراندۆم و راپرسییه‌كی جه‌ماوه‌ری بێت".

باسی لەوەشکرد "كه‌ پێویسته‌ ئه‌نجومه‌نێك بۆ نه‌هێشتنی گه‌نده‌ڵی دابمه‌زرێت و ئه‌و كه‌سانه‌ تێیدا ببنه‌ ئه‌ندام كه‌ دادوه‌ری لێهاتوو و ده‌ستپاك و بوێرن، بۆ ئه‌وه‌ی لێپێچینه‌وه‌ له‌ گه‌نده‌ڵی و گه‌نده‌ڵكاران بكه‌ن".

سەدر ئاماژەی بەوەشکرد "كه‌ پێویسته‌ سه‌رۆك وه‌زیرانی نوێ، كابینه‌ی حكومه‌ت دوور له‌ حزبه‌كان و كوتله‌ و میلیشیاكان و پشك پشكێنه‌ی تایه‌فه‌گه‌ریی و حزب و نه‌ته‌وه‌یی پێكبهێنێت و رۆڵی دادوه‌ریی كارا بكات و له‌ قسه‌ی بێمانای هه‌ندێك په‌رله‌مانتاران دوور بكه‌وێته‌وه".