مەودا میدیا - کاروان نوری 

ھاوسەرۆکی یەکێتیی نیشتمانیی کوردستان، لە کۆبوونەوەی لەگەڵ فراکسیۆنی یەکێتی لەپەرلەمانی کوردستان رایگەیاند، هەموو هەوڵێکیان بۆ دابینکردنی مووچەیە، وتیشی، کارێک دەکەن مووچەی فەرمانبەران چیتر لەلایەن بەغداوە نەکرێت بە کارتێک و بۆ کێشە سیاسییەکان بەکاربهێنرێت.

بافڵ تاڵەبانی، ھاوسەرۆکی یەکێتیی نیشتمانیی کوردستان لە کۆبوونەوەکەدا رایگەیاند "لە عیراق ھەموو ھەوڵ و توانایەکمان خستووەتەگەڕ بۆ ناردنی مووچەی ھەرێم  و دابینکردنی مافە داراییەکان و گەیشتن بە لێکتێگەیشتن"، روونیشیکردەوە "نابێت چیتر مووچەی خەڵکی کوردستان وەک فشاری سیاسی بەکاربھێنرێت و بکرێنە ئامراز و داردەست بۆ یەکلایکردنەوەی کێشە سیاسییەکان".

"لەبەرەی گەل و لەگەڵ داخوازییەکانی خەڵک و مووچەخۆران دەبین و ھەموو رێگا و فشارێکی مەدەنی و شارستانی دەگرینەبەر بۆ داکۆکیردن لەمافەکانیان و یەکێتییەکانیش وەک ھەمیشە دەبێت لەبەرەی پێشەوەی ئەو شەڕە مەدەنی و پەرلەمانییەوە بن"، لە کۆبوونەوەکەدا ھاوسەرۆکی یەکێتیی نیشتمانیی کوردستان ئەمەی وت.