مەودا میدیا- سازگار ئەحمەد

ئێوارەی ئەمڕۆ چەکدارانی رێکخراوی تیرۆرستی داعش هێرشیان کردە سەر گوندی ئوم حونتەی سەر بە ناحیەی جەلەولا، لە ئەنجامدا دوو کەس لە دانیشتووانی گوندەکە کوژران و برینداربوون.

عەقید شەماڵ عەبدولڕەحمان، بەڕێوەبەری ئاسایشی کۆکس بە مەودا میدیای راگەیاند "ئێوارەی ئەمڕۆ کاتژمێر 6:00ی ئێوارە  چەکدارانی رێکخراوی تیرۆرستی داعش هێرشیان کردە سەر گوندی ئوم حونتەی سەر بە ناحیەی جەلەولا، لە ئەنجامی رووبەڕووبوونەوەی خەڵکی گوندەکە و چەکدارەکانی داعش کەسێک کوژراو و کەسێکی دیکەش برینداربوو".

عەقید شەماڵ عەبدولڕەحمان ئەوەشی خستەڕوو "ئەو دوو کەسە دانیشتووی گوندەکەن و بە ڕەگەز عەرەبن کوژراوەکە ناوی (عومەر فازل)ە و بریندارەکەش ناوی (ساڵح)ە"، هەروەها بەڕێوەبەری ئاسایشی کۆکس ئاماژەی بەوەشکرد "لە ئێستادا شەڕ کۆتایی هاتووە و دۆخەکە ئارام بووەتەوە".

س.س