مەودا میدیا-

ئەندامێكی ئەنجومەنی باڵای سیاسی و بەرژەوەندیی یەكێتیی نیشتمانیی كوردستان رایگەیاند پەروەردەكردنی عەقڵ لە دۆزینەوەی نەوت گرنگترە، روونیشیدەكاتەوە سەرەڕای بوونی زۆری زانكۆ لە هەرێمی كوردستان كەچی لە ریزبەندی خوارەوەی زانكۆكانی جیهانن.

مەلا بەختیار، ئەندامی ئەنجومەنی باڵای سیاسی و بەرژەوەندیی یەكێتیی نیشتمانیی كوردستان لە میانەی كۆبوونەوەی لەگەڵ كۆمەڵێك خوێندكاری زانكۆدا، وتی "پازدە ساڵ لەمەوبەر وتومە دەبێ‌ زانكۆكانی كوردستان كۆنگرەیەك ببەستن‌ و ستراتیژی خوێندنی باڵا بگۆڕێت".

وتیشی "زانكۆكانی كوردستان، لە ریزبەندی پلەی زانكۆكانی جیهاندا، لە پلەكانی خوارەوەیە. لەكاتێكدا ژمارەی زانكۆكانمان زۆرن‌ و ژمارەیەكی زۆری مامۆستاش بە رێزەوە لە ئەوروپاوە گەڕاونەتەوە و وانە دەڵێنەوە، بەڵام هێشتا ئاستی زانكۆكانمان پێویستیان بە نەشونمایەكی زۆرتر هەیە".

مەلا بەختیار جگە لە پۆستە سیاسییەكەی، خاوەنی دەزگای چاودێرە و سەرپەرشتی ناوەندی دابڕان دەكات، تیشكی خستووەتە سەر گرنگی پەروەردەی عەقڵ و ئاماژەی بەوەكردووە "ئێستا گرنگترین بابەت لە دنیادا پەروەردەكردنی عەقڵە، نەك تەنها دۆزینەوەی نەوت. ئێستا لە دنیادا پەروەردەكردنی عەقڵ، بارتەقای دۆزینەوەی نەوتە، ئەوە دەزانرێت ئەو وڵاتانەی نەوتیان هەیە، بە نەوتەكەیان دەژین، بەڵام ئەی ئەو وڵاتانەی نەوتیان نییە بە چی دەژین؟ بێگومان بە پەروەردەی عەقڵ".

خ.غ